Túrkistan oblysy PD esirtki qylmysyna qarsy is-qımyl basqarmasy birlesken operasııa barysynda iri kólemde esirtki quraldaryn zańsyz tasymaldaý jáne ótkizý jaıtynyń jolyn kesti.
Anyqtalǵandaı, kúdiktiler esirtkini Jambyl oblysynan Kentaý qalasyna tasymaldamaq bolǵan. Jedel-izdestirý is-sharalary barysynda Túrkistan oblysy PD EQQIQB qyzmetkerleri men Kentaý QPB polıseıleri birlesip, avtovokzaldardyń birinen eki kúdikti adamdy ustady, olar buryn sotty bolǵan Jambyl oblysynyń jáne Kentaý qalasynyń turǵyndary. Olardyń bireýiniń sómkesin tintý kezinde jedel ýákilder quramynda ósimdik tektes esirtki bar paketti taýyp alyp, tárkiledi. Saraptama qorytyndysyna sáıkes alynǵan esirtki tektes zat 10 kg-ǵa jýyq «keptirilgen marıhýana» ekeni anyqtaldy.
Qazirgi ýaqytta atalǵan jaıtqa qatysty QR QK-niń 296-baby (Esirtki, psıhotroptyq zattarmen, olardyń analogtarymen ótkizý maqsatynsyz zańsyz jumys isteý) boıynsha sotqa deıingi tergeý amaldary júrgizilýde. Kúdiktiler qamaýǵa alyndy. Tergeý oqıǵanyń barlyq mán-jaıy men esirtki quraldarynyń jetkizý arnalaryn anyqtaıtyn bolady.
О́z kezeginde Túrkistan oblysynyń polıseıleri azamattarǵa esirtkiniń zańsyz aınalymyna baılanysty qylmys jasaǵany úshin zańda jaýapkershilik qarastyrylǵanyn eskertedi. Eger sizde esirtkini zańsyz saqtaý nemese satý jaıttary týraly aqparat bolsa, tez arada “102” nómiri arqyly polısııaǵa habarlasyńyz.
