Transparency Kazakhstan qoǵamdyq qory júrgizgen saýalnamanyń nátıjesine sáıkes memlekettik organdarǵa júgingen azamattardyń sybaılas jemqorlyqqa tap bolǵandarynyń úlesi 11,3%-dy quraǵan. Bul kórsetkish byltyrǵy jylmen salystyrǵanda 2,1% tómendegen. Máseleni «beıresmı jolmen» sheshýde qyzyǵýshylyq bildirgender – 43,9%, deldaldarǵa júginý – 24,4%-dy quraǵan. Zertteý jumysy Birikken Ulttar Uıymynyń (BUU) Damý baǵdarlamasynyń qoldaýymen iske asyrylǵan. Bul derekter Túrkistan oblysynyń ákimi О́mirzaq Shókeevtiń tóraǵalyǵymen ótken Sybaılas jemqorlyqqa qarsy is-qımyl jónindegi komıssııa otyrysynda keltirildi.
Jıynǵa oblys ákiminiń orynbasarlary, quqyq qorǵaý organdary men oblystyq basqarmalardyń basshylary jáne beınekonferensııa arqyly óńirge qarasty qala, aýdandardyń ákimderi qatysty. Komıssııa otyrysynda «Transparency Kazakhstan» qoǵamdyq qory júrgizgen áleýmettik zertteýdiń nátıjeleri jarııalanyp, «Ashyq dıalog» portalyna kelip túsken shaǵymdar boıynsha júrgizilgen saýalnama qorytyndysy boıynsha usynymdar ortaǵa salyndy. Alqaly jıynda О́mirzaq Shókeev Memleket basshysy qol qoıǵan «Qazaqstan Respýblıkasynyń keıbir zańnamalyq aktilerine sybaılas jemqorlyqqa qarsy is-qımyl máseleleri boıynsha ózgerister men tolyqtyrýlar engizý týraly» zańyna bekitilgen ózgeristerdiń mańyzdylyǵyn alǵa tartyp, memlekettik qyzmetterdi usynatyn mekemelerge barynsha halyqqa qolaıly ári sapaly qyzmet kórsetýge basymdyq berý qajettigin jetkizdi. «Jobalyq keńse jumys isteýde, «Ashyq ákimdik» bar, munyń bári prevensııa, ıaǵnı aldyn alý jaǵynan óte durys bastamalar. Sondyqtan barlyq aýdandarda ashyq ákimshilik ashýymyz kerek. Arada júrgen deldaldar bar, osy sekildi joldan taıdyratyn «kómekshilermen» kúresý qajet. Jemqorlyqpen kúreste osy «beıresmı joldy» joıý kerek», dedi oblys ákimi. Negizinen, «beıresmı jol» prosesti jedeldetý, máseleniń sheshilýine muqtaj adamnyń múddesi úshin jáne qandaı da bir sebeptermen resmı, ıaǵnı zańdy jolmen usynylmaǵan qyzmetti alý qajet bolǵan jaǵdaıda tańdalǵan.
Sybaılas jemqorlyqqa qarsy is-qımyl agenttigi Túrkistan oblysy boıynsha Departamentiniń birinshi orynbasary Mıras Qarǵabaı BUU Damý baǵdarlamasynyń qoldaýymen iske asyrylǵan zertteý qorytyndylaryn jetkizdi. Bul rette, bir jyl ishinde sybaılas jemqorlyq quqyq buzýshylyqta deldaldardyń úlesi 6% - ǵa óskenin jáne bul karantın ýaqytynda túsindirý jumystarynyń aqsaǵanymen baılanysty ekendigin, jergilikti turǵyndary sybaılas jemqorlyqqa qarsy kúreske járdemdesýge daıyn emes óńirlerdiń baryn atap ótti.
Sondaı-aq jıynda «Túrkistan – adaldyq alańy» jobalyq keńsesimen 2020 jyly atqarylǵan jumystar baıandaldy. О́ńirde jemqorlyq deńgeıin tómendetý boıynsha birqatar usynystar tyńdalyp, qoǵam indetimen kúres sharalary barlyq memlekettik organ basshysynyń qyzmetinde basym baǵyttardyń biri bolýy qajet ekendigi eskertildi.
