О́tken táýlikte shaharda COVID-19 ınfeksııasyn juqtyrǵan 9 jaǵdaı tirkeldi. Búginde qalada 1 060 tósek - oryn bar (juqpaly - 560, karantındik - 500), onyń 896 tósek-orny bos. Juqpaly jáne karantındik aýrýhanalarda 164 naýqas em qabyldaýda.
Shymkent qalasynda pandemııaǵa qarsy SPÝTNIK V vaksınasııasyn salý 1-shi aqpannan bastaldy. Qalaǵa 1000 doza vaksına jetkizildi.
Qala ákiminiń bul jolǵy efıri densaýlyq saqtaý salasyndaǵy máselelerge arnaldy. Murat Dúısenbekuly turǵyndardyń suraqtaryna jaýap berip, saladaǵy josparlardan habardar etti.
Shymkent qalasynda búginde halyqqa 123 densaýlyq saqtaý mekemesi qyzmet kórsetedi. Onyń ishinde 36 - memlekettik mekeme, 87 - jekemenshik mekeme. Osydan 2-3 jyl buryn jekemenshik klınıkalar bar-joǵy 30 shaqty bolatyn. 2019 jyly turǵyndar medısınalyq kómekti tek 1 baǵdarlama arqyly alatyn. Ol - tegin medısınalyq kómektiń kepildendirilgen kólemi paketi. Alaıda bul baǵdarlama aıasynda barlyq medısınalyq kómek qol jetimdi emes-tin. Mysaly, kúrdeli operasııalar, qymbat turatyn dıagnostıkalyq zertteýler, MRT KT jáne keıbir sırek kezdesetin zertteýler, t.b.
2020 jyly kúrdeli qaıta jóndeý jumystaryna 6,1 mlrd. teńge bólindi.
Medısınalyq qural-jabdyqtardyń 40 %-y eskirgen edi. 2020 jyly materıaldy- tehnıkalyq bazaǵa 6 mlrd. teńge qaralyp, kóptegen qural jabdyqtar alyndy. Nátıjesinde 80 %-n astamy jańartyldy. 2020 jyly jaz aılarynda "Asar" shaǵynaýdanynda modýldi ortalyq ashyldy. Qaıtpas -1, Tasken, Nurtas shaǵynaýdandarynda qyzmet kórsetetin «Atameken» emhanasy soǵyldy, onda bir aýysymda 250 adam qabyldaıdy.
Qala ákiminiń aıtýynsha, 2021 jyly bul baǵytqa taǵy da 6 mlrd. teńge bólinedi.
Bıyl ınvestorlar kómegimen qalanyń №9, №11, №12 emhana jáne 400 oryndyq balalar jáne eresekter ońaltý ortalyǵyn ashý josparlanýda.
Shymkent qalasynda ár 15 mınýtta 1 bala týylady. О́tken jyly 30 myńnan astam bala dúnıege keldi. Osyǵan baılanysty qosymsha 200 oryndyq bosaný úıin soǵý josparlanýda.
Sondaı-aq, shahar basshysy medısına salasyn aqparattandyrý, sybaılas jemqorlyq quqyq buzýshylyǵynyń aldyn alý baǵytynda atqarylatyn josparlardy baıandady.
Efır sońynda qala ákimi ádettegideı turǵyndardy saqtyq sharalaryna mán berýdi, áli de bosańsýǵa bolmaıtynyn atap ótti.
