Bul másele Reseı Federasııasynyń 5 oblysymen shektesip jatqan Batys Qazaqstan oblysynda óte ózekti. Aýyly aralas, qoıy qoralas jatqan qos eldiń azamattary arasynda alys-beris, týysqandyq qarym-qatynastyń talaı ǵasyrǵa ketetin tarıhy bar.
Sońǵy kúnderi buqaralyq aqparat quraldarynda batysqazaqstandyq memlekettik qyzmetshiler arasynda shetel azamattyǵyn alǵan tulǵalar bar ekendigi jaıly habar taraǵan kezde, el ishinde narazylar kóbeıdi.
«Bul qate aqparat. Jalpy, Qazaqstan boıynsha osyndaı oqıǵa bolǵany ras. Sondyqtan biz tıisti mekemelerge tapsyrma berip, óńirdegi memlekettik qyzmetkerlerdiń azamattyǵyn taǵy bir márte tekserýdi bastadyq. Ádette kez kelgen adam memlekettik qyzmetke kirerde arnaıy tekseristen ótedi, shetel azamaty bul qyzmetke jiberilmeıdi. Al memlekettik qyzmette júrip, shetel azamattyǵyn alatyn tulǵalar bolsa, onda ol adam qyzmetten shettetiledi», dedi Qazaqstan Respýblıkasy Memlekettik qyzmet isteri agenttigi Batys Qazaqstan oblysy boıynsha departamenti basshysynyń orynbasary Amanqos Jubanysh.
Batys Qazaqstan oblystyq Polısııa departamenti Kóshi-qon polısııasy bastyǵynyń mindetin atqarýshy Almas Nurdyń málimdeýinshe, 2020 jyldyń basynan beri oblysta 865 turǵynnyń qos azamattyq jaǵdaıda júrgeni anyqtalǵan. Bul turǵyndardyń 99-y ákimshilik jaýapkershilikke tartylǵan. Ulttyq qaýipsizdik komıtetiniń dereginshe, 23 adamǵa 100 jáne 200 aılyq eseptik kórsetkish kóleminde 252 jáne 505 myń teńge aıyppul salynǵan.
Sarapshylar qazaqstandyqtardyń ózge el azamattyǵyn alýyna birneshe sebep bar ekenin aıtady. Iаǵnı karantın ýaqytynda, tótenshe jaǵdaılar kezinde jáne qylmystyq qýdalaýǵa ushyraǵanda shekaradan kedergisiz ótip ketý úshin qos azamattyq qolaıly. Sondaı-aq kórshi eldegi zeınet jasy men mólsheri, bala týý kezindegi tólemaqy kólemi, joǵary oqý ornyna túsý kezindegi jeńildikter qyzyqtyrady eken.
Árıne, tańdaýǵa talas joq. Biraq bul eldegi jaıly qonysynan, bálkim maıly qyzmetinen de qol úzgisi kelmegendikten jasyrynyp, «qos mekendi» tirlikpen júre turǵysy keletinderge ne aıtýǵa bolady?!
Batys Qazaqstan oblysy
