– Qoǵamdyq jumysqa tartý túrindegi jaza sot úkimimen jergilikti atqarý organdary bekitken nysandarda júzege asyrylady. Bizdiń maqsatymyz – sottalǵandardy qoǵamdyq jumysqa tartý arqyly tárbıelep, qylmystyń qaıtalanýyna jol bermeý. О́ıtkeni qoǵamdyq jumystyń tárbıelik máni tıimdiligin dáleldedi. Jazasyn óteýshi azamattar ekinshi ret shalys baspaýǵa tyrysady, – deıdi Atyraý oblysy boıynsha qylmystyq-atqarý júıesi departamentiniń bastyǵy Manarbek Ǵabdýllın.
Departament bastyǵynyń aıtýynsha, jaýapqa tartylǵandar kúnine 4-8 saǵatqa deıin jumys isteıdi. Alaıda olarǵa eńbekaqy tólenbeıdi. Jazaǵa tartylǵandardyń kópshiligi – esirtkini paıdalanǵandar, mas kúıinde kólik júrgizgender, urlyq jasaǵandar. Qazir probasııa qyzmetiniń esebinde 1200 sottalýshy tur. Solardyń biri – Aman. Qylmysy úshin ókingenimen, qoǵamdyq jumysty atqarýdan qashpaıdy.
– Qylmys jasaǵanym úshin maǵan shartty jazamen qatar, qoǵamdyq jumysty atqarý mindetteldi. Kóshe tazalap júrgenime ókinbeımin. Kúnine 4 saǵat Atyraý qalasynyń kóshelerin qoqystan tazartamyn, – deıdi jazasyn óteýshi.
Kóshe tazalyǵyna tartylǵandardyń arasynda buryn brakonerlikpen aınalysyp, isti bolǵandar da bar. Oblystyq qylmystyq-atqarý júıesi departamenti probasııa qyzmeti bóliminiń ınspektory Jarqynaı Baqtııarova bergen málimetke súıensek, Isataı aýdanyndaǵy Janbaı aýylynyń 14 turǵyny Qylmystyq Kodekstiń 339-babynyń 1-bóligimen (О́simdikterdiń nemese janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý) sottalǵan eken.
– Májbúrli eńbekke tartýdy jergilikti atqarýshy organdar uıymdastyrady. Qazir Janbaı aýylynyń 14 turǵyny kúnine 4 saǵat kóshe tazalaıdy, – deıdi J.Baqtııarova.
Atyraý oblysy
