Biraq olardyń kózden tasalanbaq bolǵan «jasyrynbaq» oıyny uzaqqa barmady. Oblystyq polısııa departamentiniń qyzmetkerleri «Mıgrant» jedel-profılaktıkalyq is-sharasyn ótkizip, sot sheshimin oryndaýdan bas tartyp júrgenderdi anyqtady. Sondaı-aq jeke basyn kýálandyratyn qujaty bolmaǵan shetel azamattary da ustaldy.
– Atalǵan is-sharanyń maqsaty – el aýmaǵynda sheteldikterge tıisti baqylaýdy kúsheıtý. Sondaı-aq el zańnamasyn júıeli túrde buzatyn sheteldikterdiń qoldanystaǵy zańnama talabyna sáıkes elden shyǵyp ketýin qamtamasyz etý, – deıdi oblystyq polısııa departamentiniń bastyǵy, polısııa polkovnıgi Qamza Úmbetqalıev. – Bizdiń qyzmetkerler Qazaqstan Respýblıkasynyń kóshi-qon zańnamasyn buzyp, el aýmaǵynan óz erkimen shyǵyp ketý jónindegi sottyń qaýlysyn oryndamaı júrgen О́zbekstan Respýblıkasynyń 24 azamatyn áshkereledi. Polısııa qyzmetkerleri sheteldikterdi elden májbúrlep shyǵarý sharasyn júrgizdi.
Al Atyraý qalalyq polısııa basqarmasy bastyǵynyń birinshi orynbasary, polısııa podpolkovnıgi Erlan Bıǵambaevtyń aıtýynsha, «Mıgrant» jedel-profılaktıkalyq is-sharasy kezinde 200-den astam sheteldik azamatqa túsindirý jumysy júrgizilipti. Sonymen birge oblys ortalyǵyna taıaý ornalasqan Juldyz, Tomarly, Kóktem, Aqjar, Erkinqala, Balaýsa, Jumysker, Rakýsha, Alǵabas, Tasqala, Kókarna, Vodnıkov eldi mekenderindegi jeke turǵyn úı sektory men saıajaılar tekserildi. Nátıjesinde, jeke basyn kýálandyratyn qujaty joq 25 sheteldik azamattyń júrgeni belgili boldy. Olardyń jeke basy anyqtalǵannan keıin Qazaqstan Respýblıkasynda bolý zańdylyǵy tekserildi. Elimizdiń kóshi-qon týraly zańdylyǵyn buzǵan «meımandarǵa» qatysty ákimshilik sharalar qoldanyldy.
– Tekserý kezinde kóshi-qon zańdylyǵyn buzýdyń 119 deregi tirkeldi. Qoldanystaǵy zańnamaǵa sáıkes О́zbekstan Respýblıkasynyń 119 azamaty jáne Qazaqstan Respýblıkasynyń 41 azamaty ákimshilik jaýapkershilikke tartyldy, – deıdi ol.
Atyraý oblysy
