Árıne, shaıdan keıin azyraq seıil kóńilge kezek ótedi. Ondaıda ákemizdiń qara dombyrasyna qol jalǵaı qoıamyz. Abaı, Muqaǵalı ánderinen keshki konsertke kezek keldi degen ıshara. Ákemiz de esh bógelmesten «Kózimniń qarasynan» bastalǵan keshki konsertti óz kezeńinde «Mahańdar joq, Mahańdardyń sarqyty – Muqaǵalıdiń» sózine jazylǵan ánderge jalǵas uzaq shyrqaıdy. Biz de sabaǵymyzdy oryndap otyryp «Nur jaýyp turǵan kóktemge» kóńil qusyn ilestiremiz. Lırıkalyq ánder birtindep aqynnyń sońǵy jyldarynda jazǵan mehnatty jyrlaryna jalǵasady.
...Joq! Dáriger! Qozǵama,
damyldasyn.
Árbir júrek óziniń keýdesinde! – dep án kerýeni áýdem jer baryp toqtaıdy. Bala bolsaq ta aqyn taǵdyryna alań júregimiz júdep-aq qalady sonda...
Ýaqyttyń ájepteýir jerge baryp qalǵanyn álgi qońyr shamnyń kúıelesh pııalasynan bilemiz. Jalǵyz shamnan tógilgen jaryqty tóńirektegen bizdiń qolymyzda sonda Muqaǵalıdiń kishkene sarǵysh kitaby «О́mir-О́zen» bolar edi. Ár paraǵy ystyq, ár sózi jap-jaryq. Kókirekke birden quıyla ketetin ózen sýyndaı shapshań, tushy, káýsar poezııa óz-ózinen sanaǵa qattala qalady, jattala ketedi. Eń qudirettisi – bul kitap keıin biz kórgen qazaq shańyraqtarynyń túgelinde derlik bar ekenin bildik. Qazaq saharasynyń qaı qıyryna barmańyz, aldyńyzdaǵy bes-alty kitaptyń ishinen qaıran Muqańnyń sol «О́mir-О́zeni» qarsy alady.
Keıin ǵoı, kitap oqylmaı ketti deıtinimiz. Sol kezderde qolyna kitap ustap kórmegen bala da Muqańnan bir óleń jatqa oqýshy edi. Osydan on shaqty jyl buryn arý shahar Almatyǵa saparlap barǵan bir aqyn baýyrymyz Jazýshylar odaǵynyń kitap dúkenine bas suǵa qalsa, bos sóreleri kóp dúńgirshektiń tórinde Muqaǵalıdiń ǵana kitaby turǵanyn aıtyp keldi.
Janymyzdaǵy aqyn dosymyz: «Kitap óldi!», dedi kúıinip. Biz «Shirkin-aı!», dep tamsandyq! Árıne, sol bos sórelerde keshegi Keńshilik Myrzabekterden bastap, búgingi Batyrhan Sársenhandarǵa deıin samsap turýy kerek ekeni ras. Bizdi tamsandyrǵan Muqaǵalıdiń jaryq juldyzy edi!
Keıin zaman kóshi órge jyljydy. О́shken sham jandy, «О́mir-О́zender» jańa tırajdarmen qaıta basylyp jatty.
Degenmen aqyn óziniń kúndelikteriniń birinde jazǵandaı:
«Sol bir úıde oqshaý turǵan kósheden,
Jylaı-syqtaı kúneltkenmin keshe men...», dep biz de sol úıden, sol aýyldan uzap ketkeli qashan? Túneý kúni barsaq qońyr sham saraıdyń bir buryshynda kómeski jyldardyń kóne jádigerine aınalǵan qalpy qısaıyp eleýsiz jatyr. Qońyr shamnyń qojaıyny – kári ájemiz de baqıǵa attanǵan. Ákemizdiń kitap sóresinen «О́mir-О́zendi» qolymyzǵa alamyz. Bir túrli jabyrqaýly, eski paraqtary estelikterge tutqyndalyp qalǵandaı kóp ashylmaǵan. «Eń birinshi baqytym – Halqym meniń!» degen joldarǵa kózimiz túsedi. Aqynnyń halqy – eń áýeli ony súıip oqyǵan oqyrmandary emes pe? Jyldar kóshiniń toqyraǵanyna, qoǵam qabyrǵasynyń qaqyraǵanyna qaramastan biz Muqaǵalıdy oqyp ósken ókilder edik. О́mirdiń ózeni toqtap turmaıtyny belgili... Biz de eseıippiz. Balalyǵymyzdyń bazaryndaı qara shańyraqqa qonaǵa kelip qalaǵa qaıtatyn kólikke asyǵa otyryp jatyrmyz. Esik aldynda «Toqta, botam! Atań keledi artyńda!» dep ákemiz ben anamyz nemerelerin, Muqaǵalıdyń endigi jas oqyrmandaryn qushaqtap súıip jatyr.
Aqyn súıgen halyq, aqyn súıgen qazaq – osy aýyl, osy qara shańyraq qoı!..
