Qaýlyǵa sáıkes Atyraý qalasynda epıdemııalyq ahýal tolyq turaqtalǵanǵa deıin karantındik shekteý is-sharalary saqtalady. Ásirese kópshilik merekelik, oıyn-saýyq, kópshilik mádenı, sporttyq, bilim berý salasynda, kórmelerdi, korporatıvti, forýmdardy, konferensııalardy, sondaı-aq otbasylyq banketter, úılený toılary, mereıtoılar, eske alýlar, onyń ishinde úıde jáne jappaı adamdar jınalatyn ózge de is-sharalardy ótkizýge tyıym salynyp otyr. Sondaı-aq qaladaǵy oıyn-saýyq nysandarynyń, banket zaldarynyń, túngi klýbtardyń, karaoke, kompıýterlik jáne oıyn klýbtarynyń, kalıan, býkmekerlik keńselerdiń qyzmetin, menshik nysanyna qaramastan mektepke deıingi balalar mekemeleriniń (kezekshi toptardy qospaǵanda), mádenı nysandardyń, jeke, toptyq daıyndyqtardy qosa alǵanda kınoteatrlardyń, teatrlardyń qyzmeti toqtatyldy.
Mundaı shekteý sharalaryn kúsheıtýge ne sebep boldy? Árıne, aldymen bul meıramhanalar men dámhanalardyń shekteýdi saqtamaýyna qatysty bolyp otyr. О́ıtkeni Atyraýda osy saladaǵy kásipkerlik nysandary karantın talabyn jıi buzady. Máselen, úsh kúnde 20-ǵa jýyq kásipkerlik nysany ıeleri bul talapty saqtamaıtyny anyqtaldy. Mundaı derek Atyraý qalalyq polısııa basqarmasy men qalalyq ákimdik qyzmetkerlerinen quralǵan monıtorıngtik toptyń júrgizgen reıdi kezinde anyq baıqaldy.
– Atyraý qalasynda 29 qańtarda keshki saǵat 21:40-ta Chechil Pub bary, al saǵat 22:45 shamasynda Vivaldi, saǵat 23:30-da Urban meıramhanasy jumys istep turǵany belgili boldy. Atalǵan meıramhanalardyń árqaısysynyń ishinde shamamen 30-ǵa jýyq adam bolǵan. Karantındik shekteý talabyn «Eldorado» meıramhanasy men «Kerýen» toıhanasy da buzǵan. Sońǵysynda 20-ǵa jýyq adamnyń qatysýmen týǵan kún keshi ótken. Sondaı-aq «Morokko» meıramhanasynda 50-den astam adamǵa qyzmet kórsetilgen, – dep aqparat taratty oblystyq polısııa departamentiniń baspasóz qyzmetinen.
Al 30 qańtarda «Ryba moeı mechty» karaoke, «Loto» oıyn-saýyq klýby, «Tofý», «Rodem», «Aspandııar» meıramhanalary shekteýli ýaqyttan keıin jumys istegeni belgili boldy. Buǵan deıin «Ryba moeı mechty» klýby men «Tofý» meıramhanasy karantın rejimin birneshe ret buzǵany úshin jaýapkershilikke tartylǵan edi. «Aspandııar» meıramhanasynda da týǵan kún keshi ótipti. Osyndaı derek 31 qańtarda da anyqtaldy. Jeksenbi kúni «Masha ı Medved», «Káýsar», «Sultan Holl» meıramhanalarynda 40-50-ǵa adamǵa deıin qatysqan týǵan kún keshi toılanypty. Jumysker kentinde ornalasqan «Keremet» monshasy da kelýshilerge qyzmet kórsetedi eken. Sondaı-aq 31 qańtarda «Persona A», «Belýchı» kıim dúkenderi shekteýge qaramastan jumys istep turǵan.
Karantındik shekteý talaptaryn buzýǵa baılanysty anyqtalǵan derekterge qatysty jınaqtalǵan is-qujattar Atyraý qalalyq sanıtarııalyq-epıdemıologııalyq basqarmasyna joldandy. Alaıda karantın talabyn bir emes, birneshe ret buzǵan meıramhanalar men klýbtar jumysyn áli jalǵastyryp keledi. Nege?
Atyraý oblysy
