Sýretti túsirgen Tileýbek Shaıahmet
Saltanatty sharada oblys ákimi Danıal Ahmetov Prezıdent Qasym-Jomart Toqaevtyń sheshimimen bıyl Táýelsizdiktiń 30 jyldyǵy dep jarııalanǵanyn aıtyp, osy kezeń ishinde Qazaqstannyń álemdegi damyǵan elý eldiń qataryna enip, halyqaralyq qaýymdastyqtyń teń dárejeli múshesine aınalǵanyn atap ótti. Sonymen qatar ol Qazaqstannyń jetken jetistikterin Tuńǵysh Prezıdent – Elbasy esimimen tyǵyz baılanystyryp, aldaǵy mereıtoı eń aldymen aýyzbirshiligimizdiń merekesi ekenin aıryqsha sóz etti. Sebebi qoǵamda ornyqqan turaqtylyq, ózara kelisim men ortaq múdde jolyndaǵy jasampaz eńbek qarqyndy damýymyzdyń negizi ári kepili bolyp otyr.
– Taǵdyr bizdiń urpaqqa táýelsizdikke qol jetkizý baqytyn syılap, ony kózdiń qarashyǵyndaı saqtaýdy amanat etti. Tarıhı mindetti abyroımen iske asyrý – barshamyz úshin qasıetti paryz. Osy jolda sizderge tolaıym tabys, yntymaq pen bereke tileımin! Memleket tuǵyry berik, el rýhy bıik, Táýelsizdiktiń 30 jyldyq mereıtoıynyń saltanatty ashylýy qutty bolsyn! – dedi aımaq basshysy.
Saltanatty shara shaǵyn konsertpen jalǵasyn tapty. Sahna tórine «Altaı», «Pırýet» bı ansamblderi shyqty. «An Sal Dar» ánshiler toby Tuńǵysh Prezıdent Nursultan Nazarbaevtyń sózine jazylǵan «Otan Ana» ánin oryndady, balalardyń «Inkoro» jáne «Ińkár» toptary Elbasynyń súıip aıtatyn «Aýylym» ánin tamyljyta shyrqady, balalar hory men «Flesh» zamanaýı bı toby «Qazaqstan balalary» qoıylymyn usynyp, ónerlerin kórsetti. Saltanatty shara sońynda búkil ónerpaz zaldaǵy kórermendermen birge Ánurandy shyrqady.
Atap óterligi, eldegi jaǵdaıǵa baılanysty 510 adamǵa arnalǵan zaldaǵy saltanatqa 50 adam qatysty. Olardyń barlyǵy is-shara bastalar aldynda ekspress-test tapsyrdy.
Shyǵys Qazaqstan oblysy
