Energetıka mınıstri Nurlan Noǵaev, «KEGOC» elektr jelilerin basqarý jónindegi qazaqstandyq kompanııa» AQ basqarma tóraǵasy Baqytjan Qajıev, Almaty oblysynyń ákimi Amandyq Batalov, Jambyl oblysynyń ákimi Berdibek Saparbaev, Qaraǵandy oblysynyń ákimi Jeńis Qasymbek baıandama jasady.
«Eldegi ekologııalyq jaǵdaıdy jaqsartý Prezıdent Qasym-Jomart Kemeluly Toqaevtyń alǵa qoıǵan basym mindetteriniń biri. Ekologııa men qorshaǵan ortany jaqsartý quraldarynyń biri – jańartylatyn energııa kózderi. Atalǵan salany damytý úshin júıeli jumys júrgizý qajet», — dedi A. Mamın.
2020 jyly Qazaqstanda qýattylyǵy 583 MVt bolatyn 25 JEK nysany – 10 jel, 1 sý jáne 12 kún elektr stansııalary paıdalanýǵa berildi. Jańartylatyn kózderden elektr energııasyn óndirý 2019 jyldaǵymen salystyrǵanda 74%-ǵa 3,24 mlrd kVts-qa deıin (elde óndiriletin energııanyń jalpy kóleminiń 3%-y) ósti. Bıyl 381 MVt-qa 23 joba júzege asyrylady — 13 JES, 5 SES jáne 5 KES.
«Jasyl» ekonomıkaǵa kóshý jónindegi QR-nyń iske asyrylyp jatqan tujyrymdamasyna sáıkes, 2050 jylǵa qaraı óndiriletin elektr energııasynyń jartysy balamaly energetıkadan alynady. Bul Qazaqstan Respýblıkasynyń tómen kómirtekti jáne klımattyq ornyqty damý jónindegi Parıj kelisimi aıasyndaǵy mindettemelerin oryndaýǵa, sondaı-aq jahandyq trendterge sáıkes «jasyl energetıkany» damytýǵa jol ashady.
Qazaqstannyń biryńǵaı energııa júıesiniń turaqtylyǵyn qamtamasyz etý úshin Úkimet basshysy Energetıka mınıstrligine Ekologııa mınıstrligimen jáne «KEGOC» AQ-men birlesip, elektr energııasynyń turaqty óndirisin damytý jóninde usynystar engizýdi, sondaı-aq JEK jınaqtaýyshtaryn engizý jónindegi máselelerdi pysyqtaýdy tapsyrdy.
Energetıka mınıstrligine ákimdiktermen birlesip JEK óńirlik aımaqtaryn qurý máselelerin pysyqtaý tapsyryldy.
«Gaz elektr stansııalaryn iske qosý JEK qosymsha kólemderin ıntegrasııalaý boıynsha energııa júıesiniń múmkindikterin ulǵaıtýǵa jol ashady. Osyǵan baılanysty Energetıka mınıstrligine «KEGOC» AQ-men birlesip, 2022 jyldan bastap teńgerimdeýshi naryqty naqty ýaqyt rejıminde iske asyrý boıynsha jumys júrgizýdi tapsyramyn», — dedi A. Mamın.
