Jaıaý patrýldi polısııa batalonynyń qyzmet ınspektorlary polısııa aǵa leıtenanty Nurjan Kakeev pen Bekarys Abdoldanov kópqabatty úıdiń 9-shy qabatynda eki jigittiń ishimdik iship, bir-birine daýys kótere sóılesip turǵandaryn kóredi.
Polısııa qyzmetkerleri olarǵa túsindirý jumystaryn júrgizip, túngi ýaqytta turǵyndardyń mazasyn almaýyn ótingen. Alaıda, tártip saqshysynyń eskertýine qulaq aspaǵan eki jigit dórekilik tanytqan. Sol sátte er azamattyń biri kútpegen jerden polıseıdiń moınyna pyshaq suǵyp alǵan. Sóıtip, syrtqa qaraı qasha jónelgen.
Alǵan dene jaraqatyna qaramastan polısııa aǵa leıtenanty Kakeev Nurjan seriktesimen birge tártip buzǵan azamattyń sońyna túsedi. Syrtqa shyǵyp pyshaǵyn ondy-soldy sermegen azamatty tártip saqshylary rezińke taıaqshamen qolynan soǵyp, pyshaǵyn jerge qulatady.
Qolǵa túsken 24 jastaǵy er adam tergeý ızolıatoryna qamaýǵa alyndy. Oǵan qatysty QR QK 380-babynyń 2-bólimi boıynsha qylmystyq is qozǵaldy. Polısııa aǵa leıtenanty Nurjan Kákeevke qajetti ota jasaldy. Dárigerlerdiń aıtýynsha, ómirine qaýip tónetindeı qaýip joq.
О́skemen
