QR Memlekettik qyzmet isteri agenttiginiń Qyzylorda oblysy boıynsha departamenti bastamashy bolǵan jobanyń maqsaty - azamattardyń suranystary men qajettilikterine jedel jaýap bere alatyn básekege qabiletti ámbebap mamandar ázirleý.
«Basshylar dárisi» jobasy arqyly memlekettik qyzmetshiler túrli salalardaǵy atqarylyp jatqan jumystardan habardar etiledi. Bul memlekettik organdarǵa qabyldaýǵa kelgen adamdardy túrli mekemelerge sandaltpaı, múmkindiginshe bir jerden jan-jaqty aqparat berý úshin jasalyp otyr», - dedi departamenttiń basqarma basshysy Jasulan Shyntasov.
Memleket basshysynyń «Halyq únine qulaq asatyn memleket» tujyrymdamasyn júzege asyrý aıasynda qolǵa alynǵan jobaǵa oblys ákimdigi men QR Prezıdentiniń janyndaǵy Memlekettik basqarý akademııasynyń oblystyq fılıaly qoldaý bildirdi.
Alǵashqy kezekte akademııanyń oblystyq fılıalynda qaıta daıarlaý kýrstary men biliktiligin arttyrý semınarlarynan ótip jatqan tyńdaýshylarǵa dáris oqylady. Bıylǵy jyly fılıal bazasynda 500-den astam memlekettik qyzmetshi bilimin jetildiredi dep josparlanyp otyr.
Alǵashqy dáristi kásipkerlik jáne týrızm, ishki saıasat basqarmalarynyń basshylary ótkizdi. Aldaǵy ýaqytta aýdan jáne aýyldyq okrýg ákimdikteriniń qyzmetshilerine onlaın formatta dáris oqý josparlanýda.
Búgingi tańda Qyzylorda oblysynda 3675 memlekettik qyzmetshi jumys isteıdi. Onyń ishinde, 14 saıası, 1 «A» korpýsynyń qyzmetshisi, 3660 - «B» korpýsynyń memlekettik ákimshilik qyzmetshileri bar.
