Shıkizattyń jetispeýshiligi bizde ǵana emes, eksporttaýshy elderde de baıqalady. Tipti Reseı aǵash ónimderin syrtqa shyǵarýǵa tyıym salmaqshy.
Otandyq jıhaz óndirýshiler byltyrdan beri materıal tapshylyǵyn sezinip otyr. О́ıtkeni elde shıkizat joq. Qajet jabdyq túgeldeı Reseı men Belarýstan alynatyn. Al kórshiles kásiporyndar kúzden beri nyǵyzdalǵan aǵash jańqasynyń baǵasyn eki ese kóterip jibergen. Bul týraly jıhaz jáne aǵash óńdeý ónerkásibi qaýymdastyǵynyń prezıdenti Qanat Ibraev aıtty. Ol bir jylda taýar tasymaly 10 myń tonnaǵa deıin azaıdy deıdi. Endi sarapshy kóktemde daıyn ónimniń quny 35, tipti 50 prosentke deıin qymbattaıtynyn boljap otyr. Onyń ústine qazir Reseı bıligi nyǵyzdalǵan aǵash jańqasynyń eksportyna tyıym salmaq. Tyǵyryqqa tirelgen kásiporyndarǵa qoldaý kórsetpese, bankrotqa ushyraýy bek múmkin. Qazirdiń ózinde jıhaz shyǵarýshylardyń 60 prosentten astamy kóleńkeli naryqqa aýyp ketken. Olar memlekettik satyp alýdan góri bólshek saýdaǵa den qoıyp otyr. Búginde 900 kásipkerdiń 300-i ǵana memleketke salyq tóleıtin kórinedi. Qanat Ibraev memlekettik baǵdarlamalar endi oryndalmaı qala ma degen kúdigin jasyrmaıdy. Sebebi olar byltyrǵy baǵamen rásimdelgen. Al qazirgi baǵa múlde basqa deıdi sarapshy.
– Memleket kásiporyndardy qoldasa eken. Mysaly, Reseıdegi aǵash óńdeý kombınattarynyń birin orman ýchaskesimen birge satyp alýǵa tyrysý qajet. Tipti bolmasa, Qazaqstan úshin kepildendirilgen kvotalyq rejım engizse jaqsy bolar edi. Úkimet deńgeıinde kelisim jasalsa degen usynysymyz bar. Degenmen bul jaǵdaıda da logıstıka men baǵa turaqty bolmasy anyq, – deıdi QR jıhaz jáne aǵash óńdeý ónerkásibi kásiporyndary qaýymdastyǵynyń prezıdenti Qanat Ibraev
Pavlodarda jıhazdyń tıisti ólshemi 80 myń teńgeden bastalady, Aqtóbede 90 myń teńge, al Nur-Sultanda 100 myń teńgege barady, Petropavlda da osy baǵa. Oraldaǵy qun 110 myń teńge, Shymkentte 110 myń teńge bolady.
