2012 jyly «Báıterek» sharýaqojalyǵy bolyp qurylǵan mekeme eń aldymen 400 bas iri qara mal bordaqylaýdan bastaǵan.
2016 jyly memleket tarapynan kórsetilgen qoldaýlar arqasynda sharýashylyq aýmaǵyn ulǵaıtyp, mal bordaqylaý alańynyń syıymdylyǵyn 700 basqa deıin jetkizdi. Al 2018 jyly bul meje 1200 basqa deıin jetti. Sol jyly sharýashylyqtyń bas dırektory Tahırbek Nıshanbaev óndiris salasyn aýqymdy damytýdy qolǵa alyp, «Báıterek Agro» aýylsharýashylyǵy kooperatıvin qurdy. Kooperatıvke 20-dan asa jeke qosalqy sharýashylyqtardy biriktirdi. Bul óz kezeginde usaq sharýaqojalyqtardyń damýyna jáne birlese jumys atqaryp, óz ónimderin tikeleı deldalsyz satýlaryna sebepker boldy.
Kooperatıvte zamanaýı qural-jabdyqtarmen, tehnıkalarmen qamtylǵan sút óńdeý sehy jáne mal soıý alańy bar.
Búginde qojalyqtyń jalpy aýmaǵy 300 gektarǵa jetip, onyń 14 gektarynda qorajaılar men aýylsharýashylyǵy ónimderin óndiretin sehtar ornalasqan.
Sharýashylyqta qazirgi tańda 1300 basqa arnalǵan iri qara mal bordaqylaý alańy men 500 bas saýyndy sıyr bar. Sonymen qatar, qojalyq táýligine 8 tonnaǵa deıin sútti qabyldap, óndire alady.
Erekshe atap óterligi, sút ónimderin óndirý arqyly, atap aıtqanda súzbe, qurt, aıran, qazy, iri qara mal, jylqy, qoı etterine arnaıy sharýashylyq belgileri qoıylǵan ónimderin tikeleı deldalsyz qoljetimdi baǵada usyna otyryp, qala turǵyndary tyǵyz shoǵyrlanǵan jerlerde satylymǵa shyǵaryp otyr.
Aldaǵy ýaqytta qojalyq ıesi sharýashylyqta sútti-etti baǵyttaǵy asyl tuqymdy sıyrlardy kóbeıtip, sapaly ónim alýdy jáne reprodýktorly (asyl tuqymdy tól ósiretin) sharýashylyq qurýdy josparlaýda.
