– Naýqastardyń arasynda Teńiz kenishiniń 32 jumysshysy, Atyraý qalasynyń 10 turǵyny bar. Sondaı-aq Qurmanǵazy aýdanynda – 6, Mahambet aýdanynda 1 adamnan Sovid-19 anyqtaldy. Onyń ishinde 10 adamda ınfeksııanyń sımptomdy túri bar. О́tken táýlikte koronavırýs ınfeksııasynan saýyǵyp shyqqandar 95 adamdy qurady. Al úı jaǵdaıynda emdelýdi jalǵastyrǵan naýqastardyń sany – 276 adam. Oblystyq ınfeksııalyq stasıonarda – 72, aýdandardaǵy stasıonarlarda – 25, Teńiz kenishindegi stasıonarda 377 naýqas emdelip jatyr, – dep málimdedi oblystyq densaýlyq saqtaý basqarmasynyń baspasóz qyzmeti.
Árıne, koronavırýs ınfeksııasyna baılanysty bul derekter óńirdegi epıdemııalyq ahýaldyń burynǵydan jaqsara túskenin baıqatyp otyr. Al ony tejeýdiń joly – vaksına. Elimizde bastaý alǵan vaksınalaýǵa oraı toǵyz kúnde «Spýtnık V» vaksınasyn 873 adam saldyryp otyr. Solardyń qatarynda №7 qalalyq emhananyń dırektory Gúlnafıs Tańbaeva da bar. Onymen birge №7 emhanada birge jumys isteıtin 260-qa jýyq aq jeleńdi áriptesiniń 10%-dan astamy vaksına alyp úlgerdi.
– Medısına salasynda jumys istegenime 25 jylǵa jýyqtady. Osy kezeńde halyqtyń densaýlyǵyn saqtaý, túrli aýrýdyń aldyn alý úshin de, medısına isin uıymdastyrýshy retinde de turǵyndarmen tyǵyz baılanys ornatyp kelemin. О́ıtkeni ózge salalarǵa qaraǵanda medısına qyzmetkerleri adamdarmen kóbirek aralasady. Dárigerlerge sozylmaly aýrýy bar jandar, jalpy turǵyndar jıi júginedi, – deıdi G.Tańbaeva.
Onyń aıtýyna qaraǵanda, pandemııa tirkelgen kúnnen beri halyqtyń dárigerlerge degen senimi burynǵydan da arta tústi. Koronavırýstyń birinshi tolqynynda naýqastardyń ómirin arashalaý úshin aldymen dárigerler kúni-túni tynymsyz eńbek etti.
– Qaýipti vırýspen betpe-bet kúresken dárigerler de, orta býyn qyzmetkerleri de ınfeksııa juqtyrdy. Biraq medısına qyzmetkerleriniń mindeti – naýqastyń ómirin saqtap qalý. Dárigerler sol mindetin adal atqardy. Áli de kásibine adaldyq tanytýdy paryzy sanaıdy. Árıne, birinshi tolqyny kezinde indetten qorǵaıtyn vaksına bolmady. Soǵan qaramastan osy salanyń barlyq qyzmetkeri indetke shaldyqqan jandardyń ómiri úshin kúresti. Desek te kez kelgen ınfeksııany toqtatýdyń da, onyń aldyn alýdyń da bir joly – vaksına saldyrý. Vaksına aldymen adamdy ınfeksııadan qorǵaıdy. Sol sebepten vaksınany alǵashqylardyń qatarynda aldym. Maqsatym – ózimdi, otbasym men aınalamdaǵy áriptesterimdi, emhanaǵa keletin adamdardy qaýipti vırýstan qorǵaý. Sondyqtan jaqynyńa, janyńda júrgen jandarǵa janashyr bolý úshin vaksına alýdan qorqýdyń qajeti joq, – degen oıymen bólisti Atyraý qalasyndaǵy №7 emhananyń dırektory.
Dárigerdiń pikirinshe, osy oraıda ár adam qoǵam aldyndaǵy jaýapkershilikti jete sezinýi kerek. Bul – qaýipti vırýsty taratýshy bolmaý. Ras, áleýmettik jelide koronavırýsqa qarsy salynatyn vaksına týraly túrli qaýeset jeldeı esti. Biraq resmı dáleldenbegen aqparatqa senbegen jón.
Al kásipkerler meıramhanalar men dámhanalardyń jumys ýaqytyn ózgertýdi qalap otyr. О́ıtkeni óńirde 700-ge jýyq qoǵamdyq tamaqtaný orny bar. Onyń 400-den astamy – Atyraý qalasynda, 300-ge jýyǵy aýdandarda tirkelipti. Qazir meıramhanalar men dámhanalar saǵat 20.00-ge deıin jumys isteıdi. Bul – oblystyń bas sanıtar dárigeriniń talaby.
Osy másele Atyraý oblysynyń kásipkerler men jumys berýshiler odaǵynda ótken dóńgelek ústelde keńinen talqyǵa tústi. Oǵan meıramhanalar men dámhanalardyń ıeleri, sondaı-aq Atyraý qalasy men oblystyń bas sanıtarlyq dárigerleri qatysty. Kásipkerlerdiń suraıtyny – jumys ýaqytyn saǵat 00.00-ge deıin uzartý.
– Atyraý oblysynyń bas sanıtarlyq dárigeriniń sońǵy qaýlysyna sáıkes meıramhanalar men dámhanalardyń jumysyna saǵat 20.00-ge deıin ǵana ruqsat etilip otyr. Alaıda klıentter saǵat 20.00-den 22.00-ge deıingi aralyqta kóp keledi. Bul – bizdiń qyzmetkerler shtatyn ustaý, kommýnaldyq tólemder men nesıelerdi tóleý, basqa da operasııalyq shyǵystardy jabý úshin aqsha taba alatyn ýaqytymyz, – deıdi kásipker Nurlan Muqyshev.
Kásipkerler jumys ýaqytyn shekteý shyǵynǵa ushyratqanyn alǵa tartady. О́ıtkeni meıramhana bıznesindegi tabystyń 90%-ǵa jýyǵy juma kúni keshte jáne demalys kúnderi túsedi eken.
– Demalys kúnderi meıramhanalar men dámhanalar bir saǵatta aılyq kiristiń 20%-yn tabady. Sol sebepten jeke turǵan meıramhanalar men dámhanalarǵa bir adamǵa 5 sharshy metrlik oryn usynýmen túngi saǵat 00.00-ge deıin jumys isteýge ruqsat berýdi suraımyz, – degen usynysyn aıtty Qazaqstan Respýblıkasy qoǵamdyq tamaqtaný qaýymdastyǵynyń keńesshisi Veronıka Nurpeıisova.
Osyǵan oraı oblystyń bas sanıtarlyq dárigeri Mádenıet Tanaýov bul máseleni qarastyrýǵa ýáde berip otyr. Alaıda bul úshin birneshe sebepke nazar aýdarý qajet eken.
– Bir aptada óńirdegi epıdemııalyq jaǵdaı nasharlamaı, «sary aımaqta» qalý jalǵasýy kerek. Sonda ǵana meıramhanalar men dámhanalardyń jumys ýaqytyn saǵat 00.00-ge deıin uzartý múmkindigin qarastyramyz, – deıdi bas sanıtar dáriger M.Tanaýov.
Munaıly óńirdiń «sarydan» attap ótip, «jasyl aımaqqa» enýi epıdemııalyq ahýaldy jaqsartar jaqsylyqtyń jarshysyndaı qabyldanyp otyr. Oblystyń bas sanıtar dárigeri meıramhana bıznesindegi kásipkerlerge bergen ýádesin oryndady. Onyń keshegi qaýlysymen búginnen bastap qoǵamdyq tamaqtaný oryndarynyń jumys ýaqyty saǵat 00.00-ge deıin sozylatyn boldy.
Atyraý oblysy
