Qylmystyq-atqarý kodeksinde penıtensıarlyq júıe mekemelerindegi sottalǵan adamdardyń quqyqtary men mindetteri jazylǵan. Jazasyn ótep júrgen azamattar kedergisiz zańgerlik, medısınalyq jáne psıhologııalyq kómek alýǵa quqyly. Sondaı-aq olarǵa eńbek qaýipsizdigine, áleýmettik, zeınetaqymen qamtamasyz etýge jáne jazany óteý jaǵdaılarynyń normalaryn saqtaýǵa kepildik berilgen.
«Bizdiń basty mindetimiz – sottalǵan adamdardy ustaý sapasyn baqylaý, olardy qaıta áleýmettendirý jáne olarǵa jazany óteýdiń tıisti jaǵdaılaryn qamtamasyz etý», deıdi QAJK tóraǵasy Janat Eshmaǵambetov. Sondaı-aq QAJ komıtetiniń basshysy atalǵan termınaldardyń qyzmetkerler tarapynan oryn alýy múmkin laýazymdyq ókilettikterin asyra paıdalanǵan jaǵdaıda olardyń jolyn kesýde jáne aldyn alýda tıimdiligin atap ótti.
«Jeke quram tarapynan zańsyz is-áreket faktileri anyqtalǵan jaǵdaıda, biz jedel-tergeý toby men prokýratýra quramynda qyzmettik tergeý júrgizemiz. Laýazymdyq ókilettikterin asyra paıdalanǵany rastalǵan jaǵdaıda, bul qyzmetkerlerge qatysty jumystan bosatýǵa deıingi qatań sharalar qoldanylady. Elektrondy termınaldar sottalǵandarǵa shaǵymdy tikeleı prokýratýraǵa, al keıinnen sotqa jáne ózge de quqyq qorǵaý organdaryna, sondaı-aq ózindik qaýipsizdik qyzmetine jiberýge múmkindik beredi. Bul rásim shaǵymdardy qabyldaý jáne olardy jedel óńdeý prosesin edáýir jedeldetedi. Sondaı-aq QAJ mekemelerin beınebaqylaý júıelerimen tolyq qamtýdy qamtamasyz etý kútilýde, bul ýaqtyly baqylaýǵa jáne qyzmetkerlerdiń de, sottalǵandardyń da zańsyz áreketterin azaıtýǵa múmkindik beredi», dep tolyqtyrdy QAJK tóraǵasy.
Prokýratýra organdary men qylmystyq-atqarý júıesiniń aqparattyq júıelerin biriktirý osy jyldyń 1 aqpanynda aıaqtaldy. Sottalǵandardyń shartty túrde merziminen buryn bosatýǵa jáne jazanyń ótelmegen bóligin jazanyń neǵurlym jeńil túrimen aýystyrýǵa shaǵymdar, ótinishter men ótinishhattar berý servısi iske qosyldy. QAJ-dy damytýdyń 2019-2023 jyldarǵa arnalǵan jol kartasyna sáıkes barlyǵy 121 termınal satyp alynyp, olar sottalǵandar úshin qoljetimdi, úzdiksiz beınebaqylaý júrgiziletin oryndarda ornatyldy. Qazirgi ýaqytta QAJ mekemelerimen sottalǵandardyń bıometrııalyq derekterin tirkeý jáne osy termınaldardy paıdalaný erejelerin túsindirý boıynsha jumystar jalǵasýda.
Esterińizge sala keteıik, ótken jyldyń kúzinde quramyna QAJK basshysy, adam quqyqtary jónindegi ýákil, Ortalyq Azııadaǵy PRI baǵdarlamalarynyń óńirlik menedjeri kirgen delegasııa Almaty oblysyndaǵy Zarechnyı kentiniń QAJ mekemelerine baryp, termınaldardyń jumysyn alǵashqy ret iske qosyp, kórsetken. «Biz bas bostandyǵynan aıyrý oryndarynda baqylaý júrgizetin qoǵamdyq-baqylaý komıssııalarymen jáne Ulttyq aldyn alý tetigimen tyǵyz ózara is-qımyl jasaımyz. UAT quramyna ÚEU ókilderi, áleýmettik qyzmetkerler, zańgerler, dárigerler jáne mekemelerdiń ákimshiliginen tolyq táýelsiz jáne basqa da azamattyq tulǵalar kiredi. Olar mekemege kedergisiz kelip, ustaýda otyrǵan kez kelgen adammen sóılese alady», dedi tóraǵa.
Sondaı-aq sottalǵandardyń quqyqtyq jaǵdaıyn jaqsartý maqsatynda 2019 jyldan bastap mamandandyrylǵan «elektrondy dúkender» engizilgen. Munda taýarlardyń 400-den astam ataýy usynylǵan. Taýarlar tizimi únemi tolyqtyrylyp, keńeıtilip otyrady. Sottalǵandar azyq-túlik, kıim, kitap, tyıym salynbaǵan taýarlar men qyzmetterge tapsyrys bere alady. Buǵan sottalǵandardyń týystary da qatysa alady. Olar Qylmystyq-atqarý zańnamasyna sáıkes, sottalǵandarǵa ruqsat etilgen qandaı da bir zattardy jetkizýge tapsyrys berýge quqyly. Termınaldardyń jumysy iske qosylǵannan bastap ónerkásiptik paıdalanýǵa engizilgenge deıin sottalǵandar 26 ótinish pen 158 shaǵym jiberip úlgergen.
