Shynynda da, úlkenge izet kórsetip júrgen jaıaý patrýldegi pogondy kim eken dep, О́skemen qalalyq polısııa bóliminen surastyrǵanbyz. Jalpy qalada jaıaý patrýlde 34 qyzmetker, 6 ýchaskelik polısııa beketi bar eken. Saqshylar ózderine bekitilgen ákimshilik aýmaqta tártipti qadaǵalaıdy, qylmystyń aldyn alady. Sonymen qatar 102 arnasyna túsken shaqyrtýlar boıynsha da qyzmet kórsetedi. Demek, tártipsizdik, urlyq, atys-shabys oryn alǵan jaǵdaıda, alyp-ushyp aldymen jetetin de patrýldik polıseıler.
Solardyń biri – qarııaǵa qolǵabys etemin dep, kópshiliktiń kózine túsken Sanat Ámirenov. О́skemenniń taıǵaq kóshesinde aq jaýlyqty anany qoltyǵynan demep, turǵyndardyń janaryna jyly ushyraǵan polıseıdiń pikirinshe, bul – kez kelgen adamnyń paryzy. Solaı ǵoı, biraq bizdiń qoǵamda pogondylardyń kóshede kómek kórsetýi kózge erekshe jyly kórinedi. Árıne, azamattarǵa qaýip tónse, tártipsizdik oryn alsa, quqyq qorǵaý qyzmetkerlerine júginý ádettegi jaǵdaı. Al Sanattaı qolǵabys etip, alǵys arqalaǵandar sanaýly desem, ótirik emes.
– Bizdiń qaramaǵymyzdaǵy ákimshilik aýmaq – toǵyz joldyń torabynda. Ersili-qarsyly aǵylyp jatqan kólik kóp. Áleýmettik jelide tarap ketken sýret esimde. Ol kúni jumysqa tańerteń keldik. Kún aıaz. Qarasam, jol jıeginde aýyr sómke kótergen apa tur eken. Sómkesin alyp, joldyń arǵy shetine ótkizip jiberdim. Boıynda tárbıesi bar kez kelgen azamat úlkenge izet kórsetedi, – deıdi patrýldik polıseı Sanat Ámirenov.
Ulan aýdany, Bozanbaı aýylynyń týmasy Sanat Ámirenov – qazaqy mádenıetti, salt-sanany boıyna sińirip ósken azamat. Voleıboldaǵy jattyqtyrýshysy da tártip árkimniń ózinen bastalatyndyǵyn aıtyp otyrady.
Álbette, formadaǵy qyzmetker – memlekettiń aınasy ispetti. Sondyqtan da ortaq tártipke baǵynyp, qyzmetke adal bolyp, jan-jaǵyna jaqsylyǵymen tanylsa, quqyq qorǵaý salasynyń senimin aqtaǵany, abyroıyn asqaqtatqany.
Sońǵy jyldary polıseılerdiń el arasynan tabylyp, kómek kórsetýleri jaqsy úrdiske aınalǵan. Jýyrda qar qalyń túsken kúni О́skemenniń polıseıleri qyzmettik formasyn jumys kıimine aýystyryp, «Negizgi orta mektep-ınternaty» mekemesiniń aýlasyn qardan tazalady.
– Qalany qar basqan kúni bizdiń qyzmetkerler qolǵa kúrek alyp, mektep aýlasynyń qaryn kúredi. Senbilik kóńildi ótti. Eń bastysy, qoǵamǵa paıdamyz tıip jatqanyna qýandyq, – deıdi oblystyq Polısııa departamentiniń jeke qımyldaıtyn arnaıy jasaq komandıri Aıdar Nurmuhambetov.
Oılamaǵan jerden aýlasy aınadaı bolǵan mektep dırektory Anar Jetibaeva da oqýshylar men muǵalimder atynan tártip saqshylaryna alǵys bildirdi.
– Internat aýmaǵynda balalardy qoıyp, eresekterdiń júrýi múmkin bolmaı qaldy. Qýanyshymyzǵa oraı, polısııa qyzmetkerleri kómekke keldi. Áıtpegende, balalar oıyn alańyna jaqyndaı almaýshy edi, – deıdi mektep dırektory.
Mundaı jaqsylyq jasaý jarııalana bermegenimen, aýdandarda da dástúrge aınalǵan. Aýyldyq jerlerdegi polıseıler jumystan bos ýaqyttarynda jalǵyzbastylarǵa, qarttarǵa kómek kórsetip turady.
Shyǵys Qazaqstan oblysy
