Megapolıs áýejaıynda jolaýshylar men qyzmetkerlerdiń qaýipsizdigin qamtamasyz etý úshin keshendi aldyn alý sharalary júzege asyryldy. Termınalǵa kirgen kezde dene temperatýrasyn mindetti túrde ólsheý júrgiziledi. Áýejaı qyzmetkerleri betperde rejımin jáne áleýmettik qashyqtyqty qatań baqylaıdy. Qoldy óńdeýge arnalǵan sanıtaızerler ornatylǵan. Árbir reısten keıin ǵımarattar men perrondyq avtobýstarǵa kúsheıtilgen dezınfeksııa júrgiziledi.
Kelýshilerdi habardar etý maqsatynda adamdar kóp jınalatyn jerlerde áleýmettik qashyqtyqty saqtaý maqsatynda belgiler bar, kútý zalyndaǵy kreslolar shahmattyq tártippen belgilengen.
Áýejaıda sanıtarlyq normalardyń saqtalýyn monıtorıngtik toptar baqylaıdy. QR Sybaılas jemqorlyqqa qarsy is-qımyl agenttigi janyndaǵy Respýblıkalyq arnaıy monıtorıngtik toptyń jetekshisi Aıgúl Soloveva jáne QR Sybaılas jemqorlyqqa qarsy qyzmeti janyndaǵy RAMT tóraǵasynyń orynbasary Rafael Gasanov Almaty halyqaralyq áýejaıynda sanıtarlyq-epıdemıologııalyq sharalardyń saqtalýyna kezekti monıtorıng júrgizdi.
Monıtorıngtik top áýejaı aýmaǵyndaǵy jalpy tamaqtaný oryndarynda betperde rejımin, sanıtarlyq normalardy saqtaýdy baqylaý sharalaryn tekserdi. Sondaı-aq, teplovızorlardyń, monıtorlar men sanıtaızerlerdiń bolýyn tekserdi.
«Biz Almaty áýejaıy qoldanatyn barlyq rettilik pen algorıtmdi qadaǵaladyq. Biz ne kórdik? Birinshi kezekte, kirgen kezde - mindetti túrde betperdesiz kiresiń be jáne sanıtarlyq normalardy qanshalyqty saqtaıtynyńdy túsirip turatyn monıtordy kórip otyrmyz», - dep atap ótti Aıgúl Soloveva, sondaı-aq PTR tapsyrý pýnktteriniń jumysy máselesine toqtaldy. Onyń aıtýynsha, qala turǵyndary kóbirek jaýapkershilik tanytyp, sanaly túrde Qazaqstan aýmaǵyna qaıtyp kelgenge deıin aldyn ala PTR testileýden ótýi tıis.
Inspeksııalaý barysynda monıtorıngtik top músheleri halyqaralyq avıareısterge keletin jolaýshylardyń qozǵalys marshrýtymen tanysty. Esterińizge sala keteıik, Bas memlekettik sanıtar dárigerdiń qaýlysyna sáıkes Qazaqstanǵa kelgenderdiń barlyǵynda PTR-koronavırýstyń joqtyǵy týraly anyqtama bolýy tıis, ol berilgen kúnnen bastap 3 táýlikten aspaýy tıis. Anyqtama bolmaǵan jaǵdaıda kelgen QR azamattary PTR ádisimen COVID-19 - ǵa zerthanalyq tekserý úshin karantındik stasıonarǵa 3 táýlikke deıin oqshaýlanýǵa jatady, al sheteldik azamattar deportasııalanady.
«Biz Almaty qalasy boıynsha osyndaı monıtorıngti turaqty túrde júrgizip otyramyz. Biz áýejaıǵa baryp, koronavırýstyq ınfeksııanyń taralýyna jol bermeý úshin qala basshylyǵymen birlesip engizilgen jańalyqtarmen tanystyq», dedi Rafael Gasanov.
Aıta keter bolsaq, 9 aqpanda Almaty áýejaıyna 1 524 jolaýshysy bar 8 halyqaralyq áýe reısi keldi. Olardyń ishinde 1 303 jolaýshynyń anyqtamalary bar, 221 adamnyń anyqtamalary joq. Anyqtamasyz kelgen Qazaqstan azamattary COVID-19-ǵa PTR-taldaý ádisimen testilendi jáne karantındik stasıonarda óz nátıjelerin kútedi.
