Aldaǵy ýaqytta jumys sapasyn budan da joǵary deńgeıge kóterý josparda bar. 300-den asa oqýshy bilim alatyn oqý ordasy 2013 jyly BUU-nyń Damý baǵdarlamasy usynǵan shaǵyn grantty jeńip alyp, polıkarbonattan kólemi 24 sharshy metr jylyjaı salyndy. Bul jylyjaıdyń oqý prosesine, oqýshylardyń ǵylymı jobalaryna qosqan úlesi orasan. Olar energııany únemdeý, ósimdikterdi gıdroponıkalyq jáne hemoponıkalyq tásilmen ósirý boıynsha jobalaryn júzege asyryp keledi. Máselen, mektep túlekteri D.Ovcharov pen I.Orynbasarov bıologııadan ǵylymı jobalar qorǵap, gıdroponıka jáne balamaly energııa kózderin zertteý arqyly qoldanbaly tehnologııa salasyndaǵy jobalarymen halyqaralyq jarystardyń jeńimpazdary atandy. Marapat retinde Ulybrıtanııa men Reseıdegi halyqaralyq jastar lagerlerine joldama aldy. Sondaı-aq D.Ovcharov 2019 jyly Shyǵys Qazaqstan oblysynyń ákimi D.Ahmetovtiń jas daryndarmen kezdesýine qatysyp, óńir basshysynan syılyqqa noýtbýk aldy.
Mektep – ekologııalyq semınarlar men túrli sharalar ótkizýge arnalǵan taptyrmas alań. Respýblıkalyq áleýmettik mańyzdy bastamalardy damytý qory mundaı festıvaldardy birneshe ret ótkizdi. Oqýshylardyń qorshaǵan ortamen tyǵyz baılanysta bolyp, jan-janýarlar, qustar men ózge tiri aǵzalardy kútip-baptaýyna da jaǵdaı jasalǵan. Mektepte arnaıy buryshta qustar, balyqtar tirshilik etedi. Janýarlar áleminiń basqa da ókilderi bar. Ekologııalyq úıirme músheleri olarǵa qamqorlyq tanytyp baptaıdy.
Mektep oqýshylaryn tabıǵatty qorǵap qana qoımaı, energııa kózderin, shıkizatty tıimdi qoldanýǵa jastaıynan tárbıeleý asa mańyzdy. Ekologııalyq saýat dál osy mektep qabyrǵasynda qalyptasady. Olardyń makýlatýra men plastıkalyq bótelkelerdi qaıta óńdeýge ótkizýi osy baǵyttaǵy jetistikterdiń biri deýge bolady.
Ekologııa máselesiniń ózektiligin jiti túsingen jastar bolashaǵyn bıologııamen baılanystyryp jatady. Túlekter óz tájirıbesin ózinen keıingi oqýshylarǵa berip, birlesken jobalardy júzege asyrady. Jylyjaıda gıdroponıka ádisimen ósimdikterdi topyraqsyz, jasandy ádispen ósiretin startapty júzege asyrýdy josparlap otyrmyz.
J.Aımaýytov atyndaǵy mektep Berezovskıı aýylynda tabıǵaty tamasha jerde ornalasqan. Ár kóktem saıyn oqýshylar mektep pen qaıyńdy toǵaıdyń aınalasyn qoqystardan tazartady. О́kinishke qaraı, keıbir demalýshylar men aýyl turǵyndary jaýapsyzdyq tanytyp, aýyl aınalasyn qoqysqa toltyryp ketedi. Jas ekologtar qorshaǵan ortany lastaıtyn buzaqylardy anyqtaý úshin dron satyp alýdy da josparlap otyr.
Aımaqtaǵy ózge de mektepterdi óskeleń urpaq arasynda ekologııalyq saýattylyq máselesin qolǵa alyp, oqýshylardy jastaıynan qorshaǵan ortany qorǵaýǵa tárbıelese eken deımiz.
Qabdilrıshat QARAHANOV,
muǵalim
SEMEI
