Sýretti túsirgen Tileýbek Shaıahmet
Olardyń 160-tan astamy vaksınany oblystyq ana men bala ortalyǵyndaǵy ekpe kabınetinde salǵyzdy. Koronavırýs ınfeksııasyna qarsy ekpe alǵandardyń qatarynda ákimdiktiń mamandary men sanıtarlyq-epıdemııalyq qyzmettiń ókilderi de bar. Jalpy ekpe alý ortalyqtaryna kelgen pasıentterdi aldyn ala tekserip, terapevt dáriger ruqsat beredi. Ekpeden keıin de arnaıy bólmede belgili bir ýaqyt dárigerlerdiń baqylaýynda bolady.
– Biz – qyzyq halyqpyz. Esterińizde ǵoı, byltyr jazǵa salym jaqyndarymyz aýyra bastaǵanda «basqasynyń bárin oılap taýyp jatqan ǵalymdar tajal indettiń betin qaıtaratyn ekpe oılap tappaı ma?» dep týlaǵanbyz. Búginde sol ekpeni oılap tapty. Endi «saldyrmaımyn» dep qashyp júrgender kóp. О́zim eshkimniń qolqalaýynsyz keldim. Ekti. Bálendeı teris áseri joq, – deıdi ekpeden keıingi bólmede otyrǵan pasıent Ásem Jeńisova.
Iá, ekpeden bas tartyp jatqandar az emes. Tumaýratyp júrgen azamattyń biri vaksına salýǵa múlde qarsy ekenin aıtty. Árıne, vaksınalaý árkimniń qalaýymen bolǵandyqtan, eshkimdi eshkim qystamaıdy, kúshtemeıdi. Dáriger Aqbópe Tursynbaevanyń aıtýynsha, alǵashqy kúnderi kúnine otyz adamǵa deıin kelip ekpe alǵan.
– Ekpeden erikti túrde bas tartqandar da bar. Vaksına alamyn degen azamattar moraldyq turǵydan daıyn bolýy kerek. Basa aıta keterligi, vaksınalaýǵa basymdyq berilgen segiz kontıngent belgilengen: medısına qyzmetkerleri, pedagogter, polısııa qyzmetkerleri. Sondaı-aq, qant dıabeti bar, qan qysymy joǵary, ókpeniń sozylmaly aýrýlary, bronhıaldy demikpesi bar adamdar birinshi kezekte alýy tıis. Sebebi olardyń ımmýnıtteri tómen, – deıdi A.Tursynbaeva.
Al ekpe salýdyń óz tártibi bar. О́skemen men Semeıge reseılik Spýtnık V vaksınasynyń 270 dozasy jetkizilgen bolatyn. Olar nusqaýlyǵy boıynsha -18 gradýsta saqtalyp tur. 3 ml-dyq bir quty bes adamǵa salynady.
– Vaksınany muzdatqyshtan bes adam jınalǵan soń ǵana alyp shyǵamyz. Alyp shyqqan soń, 15 mınýttan keıin sala berýge bolady. Ashylǵan vaksınany bólme temperatýrasynda eki saǵattan artyq ustaýǵa bolmaıdy, – dep túsindirdi ekpe kabınetiniń medbıkesi Gýlıa Omarova.
Medbıkeniń aıtýynsha, ekpe salǵan jer qyzaryp, dene temperatýrasy azdap kóterilýi múmkin. Ekpeniń nusqaýlyǵynda úsh kún ishinde qyzý 40 gradýsqa deıin kóterilýi yqtımal dep jazylǵan. Bulshyq etteri aýyryp, súıekteri de syrqyraýy múmkin. Oǵan alańdaýdyń qajeti joq. Dáriger úsh kún boıy pasıentterge habarlasyp, hal-jaǵdaılaryn bilip turady. Osy ýaqytqa deıin ekpe alǵandardyń arasynda bulshyq eti aýyrsynyp, dene qyzýy kóterilgenmen, aýyr jaǵdaılar oryn almaǵan.
Shyǵys Qazaqstan oblysy
