Májilis depýtaty Baqytbek Smaǵul bastaǵan top keshe Keńes Odaǵynyń Batyry, dańqty qolbasshy Baýyrjan Momyshulynyń týǵan kúnine oraı batyrdyń Astana kósheleri biriniń boıynda oryn tepken eskertkishine gúl shoqtaryn qoıý rásimin ótkizdi.
Májilis depýtaty Baqytbek Smaǵul bastaǵan top keshe Keńes Odaǵynyń Batyry, dańqty qolbasshy Baýyrjan Momyshulynyń týǵan kúnine oraı batyrdyń Astana kósheleri biriniń boıynda oryn tepken eskertkishine gúl shoqtaryn qoıý rásimin ótkizdi.
Elordanyń aıazdy ókpek jeli bet-qoldy qarysa da, kelýshiler qatary az bolǵan joq. Atalǵan is-sharaǵa depýtattar, Aýǵan soǵysynyń ardagerleri, Ardagerler keńesiniń músheleri, «Jas Otan» jastar qanatynyń ókilderi, Olımpııa rezerviniń sportshylary jáne buqaralyq aqparat quraldarynyń ókilderi qatysty.
Ortaǵa shyǵyp sóz alǵan B.Smaǵul óz oıyn bylaısha órbitti: «Memleketimiz úshin de úlkenimiz ben kishimizge sana erkindigin qalyptastyrýda táýelsiz tulǵa kerek. Ondaı tulǵa – Baýyrjan Momyshuly. Búgingi tańda patrıotızmniń irgesin qalaǵan, ómiri ónegeli, artynda óshpes murasy bar aǵa býynnyń úlgisin urpaqqa daryta ári tarata bilýimiz kerek».
Budan keıin sózdi Saıyn Nazarbekuly aldy. «Kezinde dana bolǵan halqymyz óz qasıetinen aıyrylyp bara jatqan ýaqytta Jaratýshy bizge A.Baıtursynov bastaǵan zııaly qaýymdy berdi, oıdy umyttyrmaý úshin Abaıdy ómirge alyp keldi, erlikti este qaldyrý úshin Baýkeńdi syılady. ...Osyndaı uly tulǵalarmen maqtana ári olardy moıyndaı otyryp, qazaq halqynyń ulylyqpen ushtasqandyǵy árdaıym esimizde júrýi tıis», dedi Saıyn aǵamyz aǵynan jarylyp.
Respýblıkalyq ardagerler uıymy tóraǵasynyń orynbasary, general Bekbolat Muqyshev ta dańqty batyr eskertkishine gúl shoqtaryn qoıý úshin jáne erlik rýhyna taǵzym etý úshin arnaıy kelipti. «Kezinde ol kisiniń eńbegi baǵalanbady. «Altyn kezdik qap túbinde jatpaıdy» demekshi, Baýyrjan Momyshulynyń erligi men eńbegin qazirgi tańda álem tanyp jatyr. Túsirilip jatqan kıno jáne basqa da is-sharalar tarıhta qalady. Jastarǵa degen úlken ónege, úlgi», deı kelip, aqsaqal jastarǵa qaratyp: «Baýyrjan atalaryń sekildi batyr ári batyl bolyńdar», degen aǵalyq tilegin jetkizdi.
Al Qazaqstan Respýblıkasynyń Aýǵanstan jáne oqshaý soǵystar ardagerleri odaǵy tóraǵasynyń birinshi orynbasary Qaırat Tulǵaev óz oıyn bylaısha sabaqtady: «Aýǵan soǵysyna 22 myń 169 qazaqstandyq qatysty. Onyń ishinde 924-i erlikpen qaza taýyp, 18-i habar-osharsyz ketti. Jáne de 1115-i múgedek bolyp qaldy. Sol jigitterdiń soǵysta kórsetken erliginde, qaısarlyǵy men qaharmandyǵynda Baýyrjan Momyshulynyń da úlesi bar». Aýǵandyq ardager jastardy elimizdiń birtutastyǵy men birligin saqtaýǵa shaqyra otyryp, ol úshin tek bilek kúshi ǵana emes, bilim alýlary qajettigine nazar aýdartty.
«Jas Otan» jastar qanaty Astana qalalyq fılıaly tóraǵasynyń orynbasary Saltanat Álı: «Alash urpaǵynyń jastary búgingi tańda Elbasymyzdy, sonyń ishinde táýelsizdik týyn jelbiretken Baýyrjan syndy aǵalarymyzdy árqashan maqtan tutady. Jáne de táýelsizdigimizdiń máńgi bolýy úshin erinbeı eńbektenip, bilikti de bilimdi maman atanýymyz kerek. Eskertkishter eskerýsiz qalyp qoımasyn, qaıta jastardyń tárbıesi úshin is-sharalardy ótkizip turaıyq», degen jalyndy joldaýyn jetkizdi.
Jınalǵandar aldynda Baqytbek Smaǵul dańqty batyrǵa arnaǵan:
Biz qazaqpyz dosqa qushaq ashatyn,
Biz emespiz jaýdy kórse qashatyn.
Baýyrjandaı batyry bar birtýar,
Qazaqstan Respýblıkasy jasasyn!
– degen bir shýmaq óleńin jigerli daýyspen oqyp berdi.
Budan keıin kelgen qaýym eskertkishke gúl shoqtaryn qoıyp, Baýyrjan Momyshulynyń rýhyna taǵzym etti.
Asqar TURAPBAIULY,
«Egemen Qazaqstan».
