Baıqaýda baq synaǵan qatysýshylar aqynnyń bir óleńin naqyshyna keltire oqyp ári óleń mazmunyna saı beınerolık túsirip jelige júktedi. Bir aptaǵa sozylǵan jyr dodasyna eki myńnan astam jeli qoldanýshysy qatysqan. Olardyń arasynda elge tanymal aqyndar men ártister, sondaı-aq mektep oqýshylary da boldy. Baýyrjan Jaqyp, Baqyt Bedelhan, Aqberen Elgezek, Rınat Zaıytov syndy qalamgerler qazylyq etken saıysta Muqaǵalıdyń «Sábı ana» óleńin tebirene oqyp, áserli beınerolıkke ulastyrǵan Erkejan Tóleýbek biraýyzdan jeńimpaz dep tanyldy.
«Muqaǵalı jyry tunyp turǵan mýzyka. Ony júrekpen sezip, janyńmen qabyldaý qajet. Jeńiske adal eńbekpen jettim dep oılaımyn. Úsh mınýttyq jobany jasaýǵa úsh kúnimizdi jumsadyq. О́leńdi ózim oqyǵanymmen, beınebaıanda kásibı sheberlerdiń, úlken ujymnyń eńbegi jatyr. Bas júlde alýyma osy shyǵarmashylyq toptyń eńbegi sińdi», deıdi Erkejan Tóleýbek.
Qazylar alqasynyń uıǵarymymen birinshi, ekinshi jáne úshinshi oryndardy ıelengen júldegerler de "ULY DALA" kompanııasy usynǵan baǵaly syılyqtarǵa ıe boldy.
– Qanyna óleń sińgen adamnyń rýhy bıik, jany da taza. Úmitkerlerdiń ónerin saralaı kele, aqyn óleńin jaı ǵana oqyp qana qoımaı onyń mazmunymen qabysatyn beınerolık túsirgen naǵyz júırikti anyqtadyq. Muqaǵalı jyry urpaq boıyna tazalyqtyń, adamgershiliktiń asyl nárin egetin qundy mura. Bıylǵy mereıtoı aıasynda mundaı rýhanı máni tereń sharalar kóptep uıymdastyrylsa nur ústine nur, – deıdi Qazaqstan Jazýshylar odaǵynyń múshesi, aqyn Baqyt Bedelhan.
