Almaty qalasy Baspasóz qyzmetiniń málimetine súıensek, bıylǵy jyldyń I toqsanynda 4,6 myńǵa jýyq balaǵa áleýmettik toptama beriletin bolady. О́tken jyldyń qorytyndysy boıynsha AÁK alýshylar ishinen 1 jastan 6 jasqa deıingi 6,9 myń bala azyq-túlik jáne turmystyq hımııa zattarynyń jıyntyǵy túrinde áleýmettik toptama alady dep boljanýda. Osy jyly kepildik berilgen áleýmettik toptamany aleumet.egov.kz áleýmettik qyzmetter portalyna tolyǵymen aýystyrý josparlanyp otyr.
Ataýly áleýmettik kómekten basqa, az qamtylǵan, kópbalaly otbasylarǵa kelesi qoldaý sharalary kórsetiledi: turǵyn úı kómegi (eger bul shyǵystar otbasynyń jıyntyq tabysynyń 5 paıyzdyq úlesinen asyp ketse, turǵyn úı-kommýnaldyq shyǵystardy tóleýde); 20 AEK mólsherinde bir rettik áleýmettik kómek (58 340 tg); jeke turǵyn úıdiń menshik ıesine jalpy tarmaqtan úıge deıin gaz jabdyǵyn júrgizý jáne ornatý shyǵyndaryn óteýge birjolǵy áleýmettik kómek, emtıhan sessııasynyń nátıjeleri boıynsha «óte jaqsy» balama alǵan kóp balaly otbasynan shyqqan stýdentterge aı saıynǵy 10 myń teńge mólsherindegi áleýmettik kómek. Al 1 jastan 6 jasqa deıingi balalarǵa arnalǵan MÁK aı saıyn azyq-túlik jıyntyǵy jáne toqsan saıyn usynylatyn turmystyq hımııa taýarlarynyń jıyntyǵy túrinde usynylady. Jıyntyq quramy Úkimettiń 2019 jylǵy 30 jeltoqsandaǵy № 1032 qaýlysymen bekitilgen jáne osy jastaǵy balalardyń fızıologııalyq erekshelikterin, tamaq pen energetıkalyq qundylyqtyń araqatynasyn eskere otyryp qalyptastyrylǵan. Jıyntyqqa anemııa, rahıt, dısbakterıozdyń aldyn alý úshin kalsıı men basqa mıkroelementtermen, probıotıktermen baıytylǵan dárýmender bar túrli ónimder (sút, kókónis, jemis) kiredi.
Orta bilim berý uıymdarynda oqıtyn 6 jastan 18 jasqa deıingi balalarǵa arnalǵan MÁK mektep formasynyń nemese sport formasynyń jıyntyǵy jáne mektep-jazý kerek-jaraqtarynyń jıyntyǵy; densaýlyq saqtaý salasyndaǵy ýákiletti organ belgilegen normalarǵa sáıkes oqý jyly kezeńinde oqý orny boıynsha (oqý kúnderinde) kúndelikti bir rettik ystyq tamaq berýdi qamtamasyz etedi; qoǵamdyq kólikte (taksıden basqa) jeńildikpen jol júrýge múmkindik beredi.
