Aýǵan jaýyngerleriniń qatarynda Sergeı Veselkov, Nashym Ospanov, Valerıı Rogovskıı, Orazbek Býıkýnov, Rashıd Qasymov, Vladımır Zatrımaılov syndy ShQTÝ qyzmetkerleri de bar. Olar sonaý Aýǵan dalasyndaǵy este qalǵan oqıǵalarymen bólisti.
– Men О́skemennen áskerge 1974 jyly shaqyryldym. Jarty jyldan soń Novosibirdegi joǵary áskerı-saıası ýchılıshesine oqýǵa túsip, 1979 jyly oqý ornyn bitirdim. Keıin 1980 jyly óz erkimmen ınternasıonaldyq boryshty óteýge attandym. Rotadaǵy sarbazdardyń bári Aýǵanǵa attandy. Biz Aýǵanstanǵa kirgen alǵashqy jaýyngerlerdiń qatarynda boldyq. Shendan qalasy arqyly Kandagarǵa jetip, sol jerdegi áýejaıdy kúzetip, jaýǵa qarsy turdyq. Bizdiń 70 rotamyz júzege asyrylǵan reıdtik operasııalardyń bárine qatysty desem, artyq bolmaıdy. Taýly aımaqtarda da boldyq. Sol jerdegi Terenkot provınsııasy erekshe esimde qaldy. Turǵyndary ash. Qoryqqannan biz alyp kelgen astyq ónimderin qolymyzdan almaıtyn. Birte-birde bizdiń eshqandaı qaýip tóndirmeıtinimizdi túsinip, kómegimizdi qabyldady. Bir-birimizge baýyr basyp qalǵanymyz sondaı, qaıtarymyzda qımaı qoshtastyq. Rotamyzda 20-dan astam ult ókili boldy. Sondaı qıyn kezde bir-birimizge qamqor boldyq. Qazir jyl saıyn kezdesip, maıdannan qaıtpaǵan dostarymyzy eske alamyz, – deıdi Aýǵan ardageri Vladımır Zatrımaılov.
Kezdesýde stýdentter qyzyqtyrǵan suraqtaryn da qoıdy. Ardagerler óz oılarymen bólisip qana qoımaı, qazirgi jastarǵa beıbit ómirdi saqtaýǵa, túrli arandatýshylyqqa boı aldyrmaýǵa, Otandy qorǵaýǵa daıyn bolýǵa shaqyrdy.
