Ideıa avtorlarynyń aıtýynsha, «NisBooksBot» servısine Nazarbaev Zııatkerlik mektepteriniń 7–12 synyptaryna arnalǵan matematıka, bıologııa, fızıka, hımııa, ınformatıka, geografııa, Qazaqstan tarıhy jáne dúnıejúzi tarıhy oqýlyqtary, sondaı-aq halyqaralyq IELTS jáne SAT emtıhandarynyń daıyndyq testeri júktelgen. Mundaǵy kitaptar jalpy bilim beretin mektepterdiń oqýshylaryna da qoljetimdi oqý quraly bolmaq.
«Karantın kezinde qaǵaz túrindegi kóptegen kitaptardy tabý qıyndyq týǵyzdy. Ustazdarymyz kitaptardyń elektrondy nusqalarynyń siltemesin jiberedi. Alaıda, keıde júıeniń jıi isten shyǵýyna baılanysty kitaptardy júkteý uzaq ýaqyt alady. Osyndaı sebepten ustazdar men oqýshylardyń sabaqqa daıyndalýyn jeńildetý úshin barlyq oqýlyqty bir servıske jınadyq. Arnaıy siltemeni dostarymyzǵa messendjerler arqyly taratamyz. «NisBooksBot» servısinde kitapty ońaı júkteýge, telefonda da, kompıýterde de saqtaýǵa bolady. Aldaǵy ýaqytta kitaptardy oqý toqsandaryna bólip júkteýdi oılastyrýdamyz. Sonda ony telefonǵa júktep alý jeńildeıdi», deıdi Elnar men Saǵıden.
Endi olar servıstiń múmkindigin keńeıtýdi kózdep otyr. Bolashaqta sabaq kestesin, kórkem ádebıet kitaptary men Nazarbaev Zııatkerlik mektepterine oqýǵa túsýge arnalǵan daıyndyq testerin júktemek.
