Aıta ketý kerek, dál osyndaı is-shara eki jyl buryn Nur-Sultan qalasynda ótkizilip, oǵan eki eldiń 100-den astam bıznes ókili qatysqan bolatyn.
Qazaqstannyń 13 óńirinen 60-tan astam kompanııa men memlekettik organdardyń ókilderi engen delegasııany Syrtqy ister mınıstriniń orynbasary Almas Aıdarov bastap bardy. Mysyr tarapynan forýmǵa bıznes-qoǵamdastyqtyń 200-den astam ókili, sondaı-aq Mysyr Syrtqy ister mınıstriniń orynbasary Tarık ál-Ýasımı, Ońtústik Sınaı provınsııasynyń gýbernatory, general Haled Fýda, Mysyr saýda palatalary Federasııasynyń basshysy Ibrahım ál-Arabı qatysty.
Forýmda sóz alǵan Qazaqstannyń Mysyr Arab Respýblıkasyndaǵy Tótenshe jáne ókiletti elshisi Qaırat Lama Sharıf:
«Bizdiń elimiz Egıpetti Afrıkanyń «qaqpasy» retinde qarastyra otyryp, Qazaqstan-Mysyr Iskerlik keńesi men saýda-ekonomıkalyq yntymaqtastyq jónindegi Úkimetaralyq komıssııanyń kómegimen eksportty ilgeriletýge daıyn. EAEO-ǵa múshe elder men Mysyr arasyndaǵy erkin saýda týraly kelisimge qol qoıý qazaqstandyq ónim eksportyn ulǵaıtýǵa qosymsha serpin beredi, bul halqy 100 mln adamnan asatyn Mysyr naryǵyna jol ashady», dep atap ótti.
Spıkerlerdiń aıtýynsha, ónimniń qymbattaýy jáne eki el arasyndaǵy saýda qarqynynyń baıaýlaýy memleketterdiń arasy alystyǵyna baılanysty. Soǵan qaramastan, Qazaqstannyń taýar aınalymyn 4 esege jýyq ulǵaıtýǵa múmkindigi bar. «Bul turǵyda qazaqstandyq kompanııalar 300 mln dollarǵa jýyq somaǵa sapaly taýarlar usyna alady», dedi Saýda jáne ıntegrasııa vıse-mınıstri Qaırat Tórebaev.
Osy baǵyttaǵy jumysty jandandyrý aldaǵy ýaqytta bolatyn Mysyr Syrtqy ister mınıstriniń Qazaqstanǵa alǵashqy resmı saparymen, sondaı-aq eki el arasynda kezekti saıası jáne konsýldyq konsýltasııalar ótkizýmen baılanysty.
Is-shara barysynda «Qazaqstanda jasalǵan» ámbebap kórme uıymdastyrylyp, onda qazaqstandyq óndirýshilerdiń Afrıka qurlyǵyna eksporttaıtyn ónimderi usynyldy. Sonymen qatar otandyq jáne mysyrlyq kompanııalar arasynda ekijaqty kelissózder júrgizilip, birqatar ekonomıkalyq qujatqa qol qoıyldy.
«Egemen-aqparat»
