Dese de jerlesterimiz «Úlken dýlyǵa» sanatyndaǵy jyldyń eń alǵashqy týrnırinde úzdikter sanatynan kórinbese de, birshama materıaldyq jaǵdaıyn túzep aldy. Máselen, elimizdiń birinshi raketkasy Elena Rybakına jarystyń ekinshi aınalymyna jetkeni úshin 130,7 myń AQSh dollary kóleminde syıaqy aldy. Alaıda ol byltyrǵy jetistigin qaıtalaı almaǵandyqtan, álemdik reıtıngte 1-2-orynǵa tómen syrǵýy múmkin. 2020 jyly Rybakına 1/16 fınalǵa deıin jetken bolatyn. Al bıylǵy Australian Open básekeniń úshinshi kezeńine deıin jetip, byltyrǵy jetistigin qaıtalaǵan Iýlııa Pýtınseva men Zarına Dıas 178,9 myń dollar tabys tapty. Birinshi kezeńnen árige asa almaǵan Iаroslava Shvedova 91,8 myń dollardy qanaǵat tutty.
Erler arasynda elimizdiń úzdik tennısshisi Aleksandr Býblık jekeleı synda ekinshi, juptyq synda úshinshi kezeńge deıin jetip, álemdik reıtıngtegi 45-ornyn saqtap qaldy. Osy jetistiginiń arqasynda ol qaltasyn 144,4 myń dollarǵa qalyńdatty. Mıhaıl Kýkýshkın ekinshi kezeńge deıin jetip – 95,3, tek juptyq synda óner kórsetken Andreı Golýbev Býblıkpen birge úshinshi kezeńge shyqqany úshin 25,2 myń dollar oljalady.
