Rodjerıo Senı 1973 jyldyń 22 qańtarynda Parana shtatynyń ońtústik-shyǵysynda ornalasqan Patý-Branký dep atalatyn shaǵyn ǵana qalada dúnıege keldi. Boıy – 188 santımetr, salmaǵy – 82 kılo. Keıinnen onyń otbasy Matý-Grosý shtatyndaǵy Sınop shaharyna qonys aýdardy. Sol jaqta bozbalanyń fýtbolǵa ańsary aýyp, kóp uzamaı ol «San-Paýlý» skaýttarynyń nazaryna ilikti. 1992 jyly negizgi quramaǵa qabyldanǵanymen, 19 jastaǵy Rodjerıoǵa óziniń juldyzdy sátin týra tórt jyl kútýine týra keldi. О́ıtkeni, ol kezde aıtýly klýbtyń qaqpasyn álem chempıony, Qurlyqaralyq jáne Lıbertadores kýboktarynyń ıegeri, áıgili Dzettı qorǵaǵan. 1994 jyly ol «Santosqa» aýysqannan keıin Senı «San-Paýlýdyń» negizgi qaqpashysyna aınaldy.
Shyn máninde, Senıdiń keremet qaqpashy ekenine 2005 jyly Japonııada ótken klýbtyq álem chempıonatynda anyq kóz jetkizgen edik. Fınalda «Lıverpýl» men «San-Paýlý» kezdesti. Matchtyń 27-mınýtynda jartylaı qorǵaýshy Maneıro Ońtústik Amerıkadan kelgen komandany alǵa shyǵardy. Sodan keıin-aq aǵylshyndar tolassyz shabýyldar uıymdastyryp, bir sátke de damyldaǵan joq. «San-Paýlýdyń» qorǵaýshylary kóp qatelesip, qaqpaǵa talaı ret qaýip te tóndi. Biraq bul kezdesýde qatelikke boı aldyrmaǵan bir ǵana oıynshy boldy. Ol – Rodjerıo Senı. Brazılııanyń óreni óz qaqpasyn san márte asa qaýipti jaǵdaılardan qutqaryp, talaı ret keremet seıv jasady. Jer-jahannyń jankúıerleri Rodjerıonyń asqan sheberligine tańdanyp, tamsana tańdaı qaqty. Sol esep matchtyń sońyna deıin ózgergen joq. Aqyry «San-Paýlý» álem chempıony atandy! Fınaldyq saıys aıaqtalǵan soń brazılııalyq qaqpashy osy jarystyń eń úzdik oıynshysyna tıesili «Altyn dopty» ıelendi.
Bul rette biz tek óz kózimizben kórgendi ǵana áńgimelep otyrmyz. Al kórmegenimiz jáne osy kúnge deıin bilmegenimiz odan da kóp eken. Máselen, Senıdiń úsh dúrkin Brazılııa chempıony, eki dúrkin Lıbertadores kýbogynyń jáne bir márte Brazılııa sýperkýbogynyń ıegeri, Qurlyqaralyq kýbok pen Ońtústik Amerıka kýbogynyń ıegeri degen ataqtary taǵy bar. О́zine ǵana tıesili jeke syılyqtaryna keletin bolsaq, ár jyldary ol mynadaı júldelerdi ıelendi: álemniń (2005), Ońtústik Amerıkanyń (2005, 2006, 2007) jáne Brazılııanyń eń úzdik qaqpashysy (2002, 2003, 2005, 2006), Lıbertadores kýbogynyń eń myqty qaqpashysy jáne úzdik oıynshysy (2005), Ońtústik Amerıka kýbogynyń eń úzdik qaqpashysy (2014), Brazılııanyń eń úzdik fýtbolshysy (2006, 2007). Sonymen qatar san márte óz eli men óz qurlyǵynyń shartty quramalaryna endi. Osy oraıda biz tek negizgi jarystarda jeńip alǵan júldelerin ǵana tilge tıek ettik.
Brazılııanyń ulttyq quramasy sapynda Senı 17 kezdesý ótkizip, óz qaqpasyna 13 dop jiberip aldy. Jasyl alańǵa ol negizgi quramda sırek shyqqanymen, 1997 jyly Konfederasııa kýbogynyń ıegeri jáne 2002 jyly álem chempıony ataqtaryn ıelendi. Al «San-Paýlýdyń» sapynda Rodjerıo 941 kezdesý ótkizgen eken. Iá, 23 jyl boıy bir ǵana klýbtyń sapynda oınap, bir ǵana komandanyń namysyn qorǵaý qandaı keremet!
Biraq Rodjerıo Senıdiń negizgi rekordy bul emes. Onyń esimi eń kóp gol soqqan qaqpashy retinde álemdik fýtbol tarıhynda altyn áriptermen jazýly. О́ziniń alǵashqy dobyn golkıper 1997 jyldyń 15 aqpanynda «Ýnıo San-Jaonyń» qaqpasyna toǵytty. Sol kezden beri Rodjerıo barlyǵy 131 ret nysanany dál kózdedi. Tarqatyp aıtsaq, 70 ret penaltıdi jáne 61 ret aıyp dobyn torda týlatty. Ol az deseńiz, taǵy segiz ret nátıjeli pas bergenin de aıta ketken abzal. Iаǵnı, Senı soqqan goldarynyń sany jaǵynan dańqty Hose-Lýıs Chılaverttiń aldyn eki orap tur. San márte dýbl avtory atanǵan aıtýly qaqpashy óz karerasynda tek het-trık jasaı almapty.
Rodjerıo Senı óziniń sporttyq jolyn osydan bes jyl buryn, naqtylap aıtsaq, 2015 jyldyń jeltoqsan aıynda aıaqtady. Ol kezde Rodjerıonyń jasy 43-ke taıap qalǵan edi. Fýtbolmen qosh aıtysqan soń ol Brazılııanyń túrli komandalaryn jattyqtyrdy. Bul kúnderi áıgili qaqpashy Rıo-de-Janeıronyń «Flamengo» klýbynyń bas bapkeri qyzmetin abyroıly atqarýda.
