Aldynda atkópir bolyp jatqan maqtanyń tomardaı-tomardaı túıirshikterin qolmen tarqatyp, júndeı tútip, jibekteı jumsartyp, bıpazdap babyna keltiredi eken. Syrttaı qaraǵanda endigisi ońaı kóringen. Kúni buryn matadan daıyndalǵan qap pishindes tysyna álgi túbitteı tarqatylyp, úlpildek kúıge engen maqtany qattap salsa, matras daıyn bolardaı. Kózi kórmeıtin adamǵa mashaqat áli alda eken. Endi matrastyń ishindegi maqta ydyrap ketpeýi úshin ustap turýǵa tıisti, kóbelek keıiptes túıme-tirekterdi ornalastyrý kerek. Álde syzǵyshpen, álde qarystap ólsheıtin shyǵar dep edim. Joq, qalyptasqan mashyqpen atqan oqtaı túp-túzý qylyp túsirdi. О́lshemeı-aq. Kórmese de. Kóz kórmese de kókirek oıaý eken.
Sehtaǵy barlyq jumys qolmen atqarylady. Sondyqtan da sapaly. Múmkindigi shekteýli jandardyń tikken matrastarynda jatqan adamnyń jambasyna batatyn býyltyq túınekter áste bolmaıdy eken. Bul – úlken fabrıkadan tigilgen buıymnan bir artyqshylyǵy. Artyqshylyqtyń ónimdi ótkizer kezde qolbaılar bógeti de bar. Aıtalyq, bir matrasty daıyndaý úshin bar sharýa qolmen atqarylatyndyqtan kóp ýaqyt ketedi. Shıkizat ta qymbat. Ony bir sheti Reseıden, Qyrǵyzstan men О́zbekstannan jetkizedi. Sondyqtan da ózindik qunynyń baǵasyna áseri bar. Tenderge túsken kezde taıtalasa almaıdy. Tapsyrys qabyldaǵan soń kelisken merziminde aıaqtaý kerek. Oǵan úlgere almaı qalý qaýpi de týyndaıdy. Baǵany kóterse, ónimi ótpeı qalýy ábden múmkin.
– Osy shaǵyn seh arqyly kúnkórisimizdi aıyryp otyrmyz, – deıdi tiginshi Anna Nemykına, – negizinen tósektik oryn jamylǵylaryn tigemiz. Ár ónimniń barynsha sapaly bolǵanyn qatań qadaǵalaımyz. Tutynýshynyń talabynan shyǵýymyz kerek qoı. Olar úshin bul ónimderdi kimderdiń tikkendigi onshalyqty mańyzdy emes. Kelesi ónim ótýi úshin búgingini minsiz etýimiz qajet. Jaman tumaý jaılaǵan ýaqytta da oblystyq múgedekterdiń erikti qoǵamynyń jumysty úılestire bilýiniń nátıjesinde qol qýsyryp qarap otyrǵan joqpyz. Eger shıkizaty bolyp tursa, bizdiń qyz-kelinshekter ýaqytpen sanaspaı jumys isteýge bar.
Makınsk qalasynda jıyrmadan astam múmkindigi shekteýli adam jumysqa tartylǵan eken. Basym kópshiligi – qyz-kelinshekter. Negizgi kásipteri – tiginshilik. Qoldan keleri osy. О́ńir qyzyl aımaqta bolyp, qyrsyq shalǵanda kóbi úıde otyryp jumys istegen. Talpynǵandaryna oraı táp-táýir tabystary da bar.
Oblystyq múgedekterdiń erikti qoǵamynyń tóraǵasy Serik Ákimbaev qoǵam músheleriniń jaı-kúıin, jan-dúnıesin jaqsy biledi. О́zi de bala kezinen beri kóz kemistiginen qanshama qıyndyq kórip ósti. Áıtse de jigeri jasyǵan joq. Birjan sal aýdanynyń birneshe kásiporynynda retine qaraı jumys istedi. Qoly jattyqty, jumys barysyn kóńiline myqtap toqydy. Sol zeıin, zerektigine oraı aldynan jumys úrkip otyratyn boldy. Qoǵamdyq jumystarǵa sol kezdiń ózinde de bel býyp kirisip ketetin. Endi mine, qoǵam tóraǵasy. Ońaı-ospaq sharýa emes. Myńdaǵan adamnyń maqsat-muraty toǵysqan jer. Aryz-shaǵymdaryn da, ótinish-tilekterin de osy qoǵamǵa aıtady. Al áleýeti azdaý qoǵam báriniń birdeı ótinishin oryndap tastaýǵa qaýqary jetpegenimen, qanatymen sý sepken qarlyǵashtaı jaqsylyqqa sebepshi bolýǵa umtylady. Ol úshin eń aldymen, jergilikti atqarýshy organdarmen til tabysyp, birlese jumys istegen jón.
– Qamqorlyq jasaý qazaqtyń qanyndaǵy qasıet qoı. Qamqorlyqqa tipti saý adamdardyń ózderi zárý bolyp jatady emes pe? Al múmkindigi shekteýli adamdardyń muqtajdyqtaryna qol sozý adamgershilik, – deıdi Serik Ákimbaev, – qazirgi kúni birqatar jumys atqarylyp jatyr. Eki qala men 17 aýdanda fılıaldarymyz jumys isteıdi. О́zgege masyl bolmaý úshin jumys isteımin, ózimniń aqadal eńbegimmen kún kóremin degen adamdarǵa jaǵdaı týǵyzý paryz. Biz árkimniń eńbekke qanshalyqty qabileti bar ekendigin saraptap alyp, jumysqa ornalastyramyz. О́zge de áleýmettik-turmystyq máselelerdiń sheshilýin qadaǵalaımyz.
Qazir memleket tarapynan bul máselege jiti kóńil bólingen. Múmkindigi shekteýli adamdardyń qoǵamnyń bir múshesi retinde emin-erkin jumys isteýine jaǵdaı jasalyp otyr. Eń bastysy, taǵdyrdyń salǵan isine emenniń ıir butaǵyndaı qasqaıa qarsy turatyn kúsh-jiger bar olardyń boılarynda. Sol qasıet bar beınetti ysyryp tastap, ushpaqqa shyǵarmaq.
Aqmola oblysy
