– Polıseıler brakonerlikpen aınalysqan jigittiń túngi mezgilde «Yaqi» motokóligimen kıikti ańshylyq qarýymen atyp, múıizin zańsyz ıemdengeni anyqtaldy. Sondaı-aq Balqudyq aýylynyń mańynan múıizi kesilgen kıiktiń tórt óleksesi tabyldy, – dep habarlaǵan edi oblystyq Polısııa departamentiniń baspasóz qyzmetinen.
Al ótken aptada taǵy da eki turǵyn kıiktiń 364 múıizimen ustaldy. Ekeýi de – 23 jastaǵy jigitter. Biri – Atyraý qalasynda, ekinshisi Isataı aýdanynda turady. Olardyń brakonerlikpen aınalysqany oblystyq Polısııa departamentine qarasty krımınaldyq polısııa basqarmasy men balyq qoryna qylmystyq qol suǵýshylyqpen kúres bóliminiń qyzmetkerleri ótkizgen jedel-izdestirý is-sharasy kezinde anyqtalyp otyr.
– Is-shara kezinde Atyraý qalasyna taıaý ornalasqan «Geolog» shaǵyn aýdanyndaǵy kóp qabatty úılerdiń biriniń aýlasynda turǵan eki kólik tekserildi. «VAZ-21014» markaly avtokóliktiń birinen 200 dana kıik múıizi men quqyq qorǵaý organynda tirkelmegen qos uńǵyly «TOZ-16» markaly ańshylyq myltyǵy tabyldy. Dál osyndaı markaly ekinshi kólikte 164 dana kıik múıizi men ruqsat qujatynsyz 4,5 kalıbrli «Baıkal MR-512» markaly qarý bary anyqtaldy, – dep habarlady departamenttiń baspasóz qyzmetiniń ókili Meıirim Erdáýlet.
Qazir kúdikti retinde ustalǵan úsh jigitke qatysty sotqa deıingi tergeý júrip jatyr.
Atyraý oblysy
