Teatr akterleri qala turǵyndary men qonaqtaryna úılesimdilik pen tartymdy rejısserlik komponentterden qurylǵan tamasha mýzykalyq kesh syılady.
– Teatrymyzdyń kórermenderin qazaq poezııasynyń aqıyq aqyny M.Maqataevtyń óleńderimen jańashyl baǵytta, jastar kózqarasynda tanystyrýdy jón sanadyq. «Ǵashyq júrek» qoıylymy óleńder arqyly aqynnyń búkil bolmysyn kórsetedi. Qazir qoǵamda «Jastar poezııany oqymaıdy, óleńdi kóp túsinbeıdi» degen kereǵar uǵym bar. Sondyqtan da osy sahnalanyp jatqan qoıylym erekshe shynaıy sezimderdi tarqatatyn bolady. Jas urpaqtyń boıynda aqyn shyǵarmashylyǵy týraly erekshe oı qalyptastyrady dep senemin, – dedi teatr dırektory Ashat Maemırov.
Iá, poezııa men Muqaǵalı, aqyn óz óleńinde tolǵanǵanyndaı, egiz uǵymǵa aınalyp ketkeni ras. О́leń dese, poezııa dese birden oıymyzǵa kele qalatyn tulǵalardyń biri de osy Muqaǵalı ekeni anyq. Sondyqtan da halqymyzdyń asyl perzentiniń, ádebıetimizdegi úlken sýretkerdiń esimi árqashan da el esinde júrýi tıis. Osy maqsatty ustanǵan talantty teatr ujymy «Ǵashyq júrek» qoıylymy arqyly óleńsúıer kórermenniń kóńil pernesine boılady.
Muqaǵalı Maqataevtyń beınesin teatr akteri Qazybek Esqara, al onyń dosy Shámildiń rólin Ernazar Jańatilek keıiptedi. Kópshilik sahnada teatrdyń jas ártisteri óner kórsetti. Bolat Joldasov mýzykasyn árlegen qoıylymda teatr orkestriniń súıemeldeýimen muzbalaq aqynnyń «Esińe meni alǵaısyń!», «Kún qaıda», «Ana, sen baqyttysyń», «Japyraq júrek jas qaıyń», «Otyzdan asyp baramyn», «Kúreń kúz», «Baqyt degen», «Sábı bolǵym keledi», «Qaıran jeńgem», «Qazaqstanym» shyǵarmalary jáne odan bólek «Altaı-Atyraý» poemasy, sondaı-aq «Baqyt degen ne ózi?!», «Shyda, shyda», «Súıedi ekem», «Shámil-aý» jáne taǵy da basqa poezııalary oqyldy.
Spektakl sońynda belgili jazýshy, Qazaqstannyń eńbek sińirgen qaıratkeri Shárbaný Beısenova qoıylymnan alǵan áserimen bólisip, jas teatr ujymyna júrekjardy lebizin bildirdi:
– Búgin qazaqtyń qara óleńiniń úlken qudiretin tanytqan aqyn – Muqaǵalı Maqataevtyń shyǵarmashylyǵy úshin, qurmeti úshin, arýaǵy úshin osyndaı qoıylym kórsetildi. Adam ózi óleńdi tazarý úshin oqıdy dep oılaımyn. Adamnyń sanasyn, kóńil kúıin dál osy óleńdeı, kúıdeı tazartatyn qudiret joq shyǵar. Sondyqtan jastarymyz óleń oqyp ósse, bizdiń ádebıetimizdi tanyp bilse, elimizdiń keleshegi zor bolady. Biz osy teatr ashylǵannan beri turaqty kórermenine aınaldyq, – dedi jazýshy.
Osylaısha uly aqyn shyǵarmalary teatr sahnasy arqyly bolashaqqa máńgilik jol saldy. Ony aqyn poezııasyn shabyttana oqyǵan jastardyń jalyndy janry jáne bir márte aıqyn sezindirgendeı. Qoıylymnan shyn máninde ózi jaıly ózi aıtyp ketken aqyn júreginiń únin estigendeı boldyq. Ol – Muqaǵalıdiń «Ǵashyq júregi»!
