Alqaly jıynǵa qatysýshylar elimizdegi barlyq mekteptiń mańdaıshalaryna, olardyń tildik erekshelikterine qaramastan, Ybyraı atamyzdyń jastardy oqý men bilimge shaqyratyn «Kel, balalar, oqylyq!» degen úndeýin jazyp qoıý týraly bastamany uly aǵartýshynyń 180 jyldyq toıyna oraılastyryp, jumyla júzege asyrý máselesin kóterdi.
Arqalyq pedagogıka ınstıtýty ǵylymı konferensııany uly aǵartýshynyń 180 jyldyǵyna oraı uıymdastyryp otyr. Ǵylymı jıyndy atalǵan joǵary oqý ornynyń basshysy Seıitbek Qýanyshbaev ashty.
– Konferensııada Y.Altynsarınniń aǵartýshylyq-pedagogıkalyq qyzmetiniń mańyzy men uly pedagogtiń jahandyq syn-qaterler men ózgerister dáýirindegi pedagogıkalyq ıdeıalarynyń búgingi kúnniń máselelerimen sabaqtastyǵy týraly tyń pikirler qozǵaldy, – dedi ınstıtýt rektory.
Ǵylymı konferensııaǵa ybyraıtaný salasynda eńbektenip júrgen otandyq ǵalymdar men Túrkııa, Reseı ǵalymdary qatysty. ArqPI «Rýhanı jańǵyrý» jobalyq keńsesiniń dırektory Roman Aımaǵambetulynyń aıtýynsha, Elbasynyń «Rýhanı jańǵyrý» baǵdarlamasy men «Uly dalanyń jeti qyry» baǵdarlamalyq maqalasynyń aıasynda búginde tarıhymyzǵa qaıta úńilip, talaı tarıhı muralar zerdelendi.
– Qazirgi kezde Altynsarınniń qyzmeti men eńbegine ǵalymdar jańasha baǵa berýde. Konferensııa barysynda uly aǵartýshynyń pedagogıkalyq murasynyń jańashyldyǵy men tarıhı mańyzy týraly kóptegen ǵylymı topshylaý aıtyldy, – dedi jobalyq keńse jetekshisi.
Qostanaı oblysy
