El nazaryn ózine aýdarǵan, jas urpaqtyń tárbıesine táp-táýir áser etetin qaıyrymdylyq sharasyna isker áıelder qaýymdastyǵy jumyla kiristi. Shaǵyn aýyl turǵyndary bul bastamaǵa túsinistikpen qarady. Eshkim isherge as tappaı otyrmasa da, janyńda janashyr adamdardyń bolǵany qandaı jaqsy. Kóńil demeıdi, senimdi arttyrady. Al quraqtaı jelkildep ósip kele jatqan jas balalar burynnan sabaqtasyp kele jatqan ata dástúrdiń artyqshylyǵyn, ǵajaıyp mazmunyn zerek kóńilderine toqıdy. О́se kele óz ata-anasy ǵana emes, ózge de adamdarǵa qaıyrymdy bolyp júredi. Saıyp kelgende, birlik bekip, bereke arta túspek.
– Osy mektepte tórt jyl jumys istedim, tárbıe jumysymen aınalystym, – deıdi isker áıelder qaýymdastyǵynyń múshesi Kúlbarshyn Seıpinova. Bul aradaǵy basty mindet – adamdardyń qoǵam izgiligin sezinýi. Onkúndik aıasynda kóp balaly, jalǵyzilikti on shaqty otbasyǵa azyq-túlik sebetteri berildi. Árqaısysynyń quny 30-35 myń teńge kóleminde. Mańyzdysy ol da emes, izgilikti sharany uıymdastyrý arqyly mektepte bilim alyp jatqan 137 oqýshynyń árqaısysy halqymyzdyń qaıyrymdylyq degen qasterli qasıetiniń mánin túsinetin boldy.
Kóńil eljiretetin iske demeýshi bolǵandar ózderiniń aty-jónderin jarnamalaǵandy qalamaıdy. «Jaqsylyq jasasań aıǵaılap aıtý mindetti emes» deıdi olar. Biz de sol pikirge qosyldyq. Eń bastysy, qazirgi kúni shet jaılap shalǵaıda júrse de týǵan aýyldarynyń tútinin túzý ushyrsam degen perzenttik peıildiń moldyǵyn kórdik. «Sabaqty ıne sátimen» degendeı, eljandy azamattardyń bolmysyn keıingiler uqsa bolǵany.
Aqmola oblysy,
Zerendi aýdany
