Keńes jumysyna óńir basshysy Mahambet Dosmuhambetov, qoǵam qaıratkerleri, ekologııalyq uıymdar men ónerkásiptik kásiporyndardyń ókilderi qatysty.
«Memleket basshysy Qasym-Jomart Kemeluly Toqaevtyń tapsyrmasyna sáıkes, biz jańa Ekologııalyq kodekstiń normalaryn jergilikti turǵyndarmen, ekobelsendilermen talqylaý úshin óńirlerge saparymyzdy jalǵastyramyz. Osy maqsatta biz búgin Atyraý oblysyna keldik. Bizdiń mindetimiz – halyqty osy normalardyń qalaı iske asyrylatyny jáne óńirdiń ekologııalyq jaǵdaıyn jaqsartatyny týraly habardar etý. Ekokodekstiń mańyzdylyǵy onyń adam ómiri men densaýlyǵy, qolaıly ómir súrý ortasyn qamtamasyz etý, iri jáne shaǵyn bıznestiń qyzmetin qamtý sııaqty búkil qoǵamnyń múddelerin qozǵaýynda», dedi Maǵzum Myrzaǵalıev.
Mınıstrdiń orynbasary Ahmetjan Pirimqulov Ekologııalyq kodekstiń negizgi baǵyttaryn atap ótti. Onyń aıtýynsha, jańa Kodekske sáıkes, 2022 jyldan bastap jergilikti atqarýshy organdar tabıǵatty qorǵaý sharalary túsetin ekologııalyq tólemder esebinen 100% kóleminde qarjylandyratyn bolady.
«Atyraý atmosferalyq aýanyń lastaný deńgeıi joǵary 10 qalanyń qataryna kiredi. Bul jaǵdaıdy sheshý úshin Ekokodeks sheńberinde «lastaýshy tóleıdi jáne túzetedi» qaǵıdatyn engizý, eń ozyq qoljetimdi tehnologııalarǵa kóshý, qorshaǵan ortaǵa áserdi baǵalaýdyń jańa tásilderin qoldaný, ekologııalyq zańnamany buzǵany úshin jaýapkershilikti qatańdatý, shyǵaryndylar monıtorınginiń avtomattandyrylǵan júıesin engizý, óndiris jáne tutyný qaldyqtaryn basqarýdy jetildirý sııaqty baǵyttar iske asyrylatyn bolady», deıdi vıse-mınıstr.
Ol iri kásiporyndar 10 jyl ishinde ekologııalyq tıimdilik baǵdarlamasyna sáıkes eń ozyq qoljetimdi tehnologııalardy engizetinin habarlady. Osy kezeńde olar emıssııa úshin tólemnen bosatylady. Eger kásiporyndar ozyq qoljetimdi tehnologııaǵa aýyspasa, onda emıssııalar úshin tólemder ósedi. Máselen, 2025 jyldan bastap olar 2 ese, 2028 jyldan bastap 4 ese jáne 2031 jyldan bastap 8 ese ósedi.
Qoǵamdyq uıymdardyń ókilderi Ekologııalyq kodeks normalaryna qoldaý bildirdi.
Sonyń ishinde «Atameken – Eko» qoǵamdyq qorynyń basshysy Arman Haırýllın Ekokodekstiń 175-babyna toqtaldy. Oǵan sáıkes kásiporyndar anyqtalǵan buzýshylyqtardy joıý týraly ekologııa departamentiniń nusqamalaryn qatań oryndaýy tıis, olaı bolmaǵan jaǵdaıda merzim aıaqtalǵan sátten bastap ósimpul esepteledi. Ekoambassadordyń aıtýynsha, bul – qajetti qadam.
«Sondaı-aq, buryn Kásipkerlik kodeks qorshaǵan ortany qorǵaý salasyndaǵy ýákiletti organdarǵa lastaný faktileri kezinde jedel áreket etýge múmkindik bermedi. Endi lastaýshy zattar shyǵaryndylarynyń normatıvterinen edáýir asyp ketýi týraly BAQ-taǵy jarııalanymdardy taldaý nátıjeleri jospardan tys tekserý júrgizý úshin negiz bola alýy múmkin. Ekologııa máselelerinde bıýrokratııa bolmaýy tıis», dep esepteıdi qor basshysy.
"Jaıyq-Kaspıı Orhýs" ortalyǵynyń basshysy, oblystyq «Adaldyq alańy» jobalyq keńsesiniń basshysy Shynar Iztileýova qorshaǵan ortaǵa áserdi baǵalaý úderisinde qoǵamnyń rólin kúsheıtýdi pármendi norma dep atady.
«Jańa Ekokodekste kóp nárse bar. Mysaly, strategııalyq ekologııalyq baǵalaý uǵymy, áser etý skrınıngi, transshekaralyq QOÁB jáne basqalar. Aldaǵy ýaqytta da NQA ázirleý kezinde qoǵam ókilderin belsendi túrde tartý qajet», dep esepteıdi ol.
Sonymen qatar, S.О́tebaev atyndaǵy Atyraý munaı jáne gaz ýnıversıtetiniń rektory Gúlzada Shakýlıkova jańa Ekologııalyq kodeksti tıimdi iske asyrý úshin qoǵamnyń ekomádeneıetin qalyptastyrý mańyzdy ról atqarady degen pikir bildirdi.
Kezdesýge qatysýshylarǵa jańa Ekokodekske sáıkes ákimshilik jaýapkershilik kúsheıtilgeni týraly da aıtyldy. Máselen, qorshaǵan ortaǵa emıssııalar normatıvterinen asyp ketkeni úshin ákimshilik aıyppul 10 ese ulǵaıdy. Al, qaldyqtardy jınaý nemese jaǵý kezinde atmosferalyq aýany qorǵaý jáne órt qaýipsizdigi talaptaryn saqtamaǵany úshin aıyppul 5 esege deıin artty.
