Saparda Memlekettik hatshymen birge Almaty oblysynyń ákimi Amandyq Batalov, Almaty qalasynyń ákimi Baqytjan Saǵyntaev, QR Mádenıet jáne sport mınıstri Aqtoty Raıymqulova, Jazýshylar odaǵynyń tóraǵasy Ulyqbek Esdáýlet birge júrip, Qarasaı jáne Jambyl aýdandaryndaǵy birqatar áleýmettik-mádenı nysandarda boldy.
Resmı ókilder aldymen Úshqońyr aýylynda ashylǵan Qazaqstan Respýblıkasy Tuńǵysh Prezıdenti – Elbasynyń «Atameken» tarıhı-mádenı ortalyǵyna atbasyn tiredi. Munda Elbasy Nursultan Ábishuly Nazarbaevtyń Qazaqstannyń táýelsizdikke qol jetkizýindegi, táýelsizdikti qalyptastyrýdaǵy, ishki-syrtqy saıasatty bekemdeýdegi tarıhı rólin aıshyqtaıtyn mýzeılik ekspozısııalarmen tanysty. Mýzeıdiń arnaıy tilek kitapshasyna Memlekettik hatshy óz qoltańbasyn qaldyrdy.
Sol sııaqty Memlekettik hatshy «Rýhanı jańǵyrý» baǵdarlamasy boıynsha «Týǵan jer» jobasynyń aıasynda salynǵan «Úshqońyr» dene shynyqtyrý-saýyqtyrý kesheninde boldy. Keshen ishindegi basseındi, sport zaldaryn aralap, daladaǵy fýtbol alańyn kórip, sporttyq jattyǵýlar men oıyndardyń barysyna kýá boldy.
Osy kúni Q. Kósherbaev J.Jabaevtyń ádebı-memorıaldy mýzeıine de arnaıy bardy. Aldymen mýzeı aldyna qoıylǵan aqynnyń eskertkishine gúl shoqtaryn qoıyp, taǵzym etti. Jyr alybynyń ózi turǵan úı mýzeı retinde jabdyqtalǵan. Onyń ishki bólmelerin, aqynnyń tutynǵan buıymdaryn, mýzeı qabyrǵasyna jaǵalaı ilingen ómiri men tvorchestvosy týraly jádigerlerdi tamashalady. Oblys ákim Amandyq Batalovtyń aıtýynsha, ádebı mýzeı keıingi jyldary keńeıtilip, qosalqy ǵımaratpen tolyqtyrylǵan. Osy arada oblys basshysy bıylǵy mereıtoılaryna baılanysty Jetisý óńiri arnaıy shyǵarǵan Jambyl men Muqaǵalı aqyndardyń kitaptaryn qonaqtarǵa syıǵa tartty.
Jınalǵandar J. Jabaevtyń jáne ónerdegi piri, rýhanı ustazy Súıinbaı Aronulynyń, kompozıtor ári dırıjer Nurǵısa Tilendıevtiń zırattaryna táý etti.
Sapar qorytyndysynda QR Memlekettik hatshysy Qyrymbek Kósherbaev epık aqynnyń 175 jyldyq mereıtoılyq is-sharalaryn uıymdastyrý úshin arnaıy memlekettik komıssııa qurylǵanyn, kelesi aptada komıssııanyń birinshi otyrysy ótetinin aıtty.
- Bárimizge belgili, 28 aqpan – alyp aqynnyń týǵan kúni. Sonyń qarsańynda mereıtoılyq is-sharalar Nur-Sultan qalasynda bastalyp, Qazaqstannyń barlyq óńirlerinde jáne shet elderde jappaı ótkiziletin bolady. Búgin biz Elbasynyń jáne Prezıdenttiń tapsyrmalarymen Almaty oblysyna arnaıy kelip, Jambyl atamyzdyń basyna táý etip, is-sharalardyń alǵashqy qadamyn bastap otyrmyz. О́tken jyly hákim Abaıdyń 170 jyldyǵyn atap ótsek, bıyl Jambyl babamyzdyń mereıli jyly. Ekeýi de bir dáýirde, bir zamanda ómir súrgen – alyptar. Jambyl aqyndy aıtys óneriniń shyńynda tur desek, onyń sondaı bıikke órleýine yqpal etken, ózi «pirim» deıtin - Súıinbaı Aronuly. Sondyqtan XXI ǵasyrdyń túrli ún qatýlaryna laıyqty jaýap berý úshin biz osyndaı úlken rýhanı sabaqtastyq pen ıgi dástúrdi jalǵastyra otyryp, ózimizdiń rýhanı bastaýlarymyzdy, uly tulǵalarymyzdy tanyp-bilýimiz kerek, - dedi Qyrymbek Kósherbaev.
Atap ótsek, Almaty oblysynda Jambyl Jabaevtyń mereıtoıyna baılanysty is-sharalar jospary ázirlengen. Onda aqyn týraly bıografııalyq fılmniń túsirilimi, ómiri men shyǵarmashylyǵyna qatysty kitaptar shyǵarý, aqyndar aıtysyn ótkizý, mádenı eskertkishter ornatý, sýretshilerdiń halyqaralyq plenerin ótkizý jáne t.b. sharalar qarastyrylǵan.
