«Bıyl aýmaqtardy abattandyryp, qala turǵyndary men qonaqtary ýaqytyn paıdaly ótkizetin jańa kópshilik oryndar qurý jumystaryn jalǵastyramyz. Mysaly, qala saıabaqtaryn jasyl arterııaǵa aınaldyrýdy josparlap otyrmyz: velosıped pen jaıaý júrginshiler joldary jasalady.
Turǵyndar jazdyń shýaqty mezgilderin erekshe jaqsy kóredi. Qalaǵa bir jaǵajaı jetkiliksiz. Aqbulaq ózeniniń jaǵalaýyn abattandyrýdy sheshtik. Qalada jańa jaǵajaı paıda bolady.
Oqýshylar saraıynyń janynda taǵy bir skeıt-saıabaq ashylmaq.
Prezıdenttik saıabaqta taqtaı tóselgen jaǵalaý josparlap otyrmyz.
Kezdesý kezinde sport federasııalarynyń basshylary - saıabaqtarda sportshylar men basqa da sportpen shuǵyldanatyn adamdar kıim aýystyryp, sport jabdyqtary men zattaryn saqtaı alatyn oryn-jaılardyń bolmaýy máselesin kóterip edi. Sondyqtan Trıatlon parkte sport pavılonyn ashamyz. Onda kıim aýystyratyn bólmeler, jattyqtyrýshylar mektebi ornalasady. Bul jobany qalanyń basqa saıabaqtaryna keńeıtetin bolamyz. Parkterdi múmkindigi shekteýli adamdardyń múddelerin eskere otyryp damytamyz.
Byltyr jańa qoǵamdyq keńistikterimiz kópshiliktiń kóńilinen shyqty. Mysaly, Kóktal eldi-mekeninde úlken saıabaq ashyldy, Saraıshyq kópiriniń astynda sporttyq aımaqtar paıda boldy, qalanyń jas turǵyndarynyń ótinishi boıynsha alǵashqy skeıt-aımaq ashyldy. 76 gektardan astam jer abattandy. Qalanyń eski bóligi men eldi-mekenderge basa nazar aýdaryldy. Bıyl da bul jumys jalǵasady.
Memleket basshysynyń tapsyrmasy boıynsha jańa qoǵamdyq keńistikter (saıabaqtar, skverler, býlvarlar) qurý, aýla aýmaqtaryn abattandyrý - qala turǵyndaryna sportpen aınalysýǵa, salaýatty ómir saltyn nasıhattaý úshin jaǵdaı jasaýǵa múmkindik beredi.
Sonymen qatar, qalanyń barlyq aýdandaryn kógaldandyrýdy jalǵastyramyz. Elbasy atap ótkendeı, qalanyń bas jospary ǵımarattardyń, jasyl jelekter men ormannyń sımbıozy retinde jasaldy - "úıler men ǵımarattardyń aınalasynda aǵashtar otyrǵyzylyp, aýmaq jasyl bolýy kerek, ǵımarattyń aınalasynda bos jerlerdiń bolmaýy shart". Siz de qalany kógaldandyrýǵa qatysyp, óz úlesińizdi qosa alasyz!
Elordany "Nur-Sultan - jaıly qala" master-jospary aıasynda damytýdamyz. Elordamyzdy birlesip damytý jáne qalany shynymen jaıly etý úshin BIRGE (BIRGE) saıty iske qosyldy https://birge-elorda.kz/nur-sultan/). Osy platformada siz ártúrli baǵyttar boıynsha usynystar men óz kózqarasyńyzdy qaldyra alasyz. Platformanyń jumys isteý prosesi qarapaıym: birinshi - ıdeıany usyný, ekinshi - irikteý, úshinshi - jobany júzege asyrý. Osy aptada 115-ten astam usynys tústi! Qalada turǵyndardyń eń jaqsy usynystaryn júzege asyramyz!» - dep jazdy elorda ákimi.
