«Qan tapsyr – ómirdi qutqar» qaıyrymdylyq aksııasyna Assambleıanyń barlyq múshesi, etnomádenı birlestikterdiń, jastar uıymdarynyń ókilderi, sonymen qatar Assambleıanyń qoǵamdyq jáne salalyq uıym ókilderi qatysýda.
«Tań» tatar-bashqurt mádenı ortalyǵy tóraǵasynyń birinshi orynbasary Ravıl Valıevtiń aıtýynsha, bul aksııa «30 ıgi is» bekitilgen baǵdarlamasy aıasynda alǵash ret ótýde.
«Biz Qazaqstan halqy Assambleıasynyń múshesi retinde júıeli túrde qan tapsyramyz. Bıyl bizde qala ákiminiń orynbasary Baqtııar Mákenniń qatysýymen QHA Keńesiniń otyrysy ótti. Otyrys aıasynda biz Táýelsizdigimizdiń 30 jyldyǵyna «30 ıgi is» baǵdarlamasyn bekittik. Al búgingi aksııa «30 ıgi is» baǵdarlamasy aıasynda alǵash ret ótip tur», – dedi ol.
Sonymen qatar ol ár jarty jyl saıyn ótip turatyn «Qan tapsyr – ómirdi qutqar» aksııasy aıasynda QHA músheleriniń júıeli túrde qan tapsyryp turatynyn atap ótti.
«Qan tapsyrý tek qoǵamǵa ǵana emes, sonymen qatar aǵzaǵa da paıdaly. Men osymen úshinshi ret qan tapsyryp turmyn. Jarty jyl saıyn osy aksııany ótkizip turamyz. Eń aldymen biz test tapsyryp, odan keıin qan tobyn testileýge baramyz. Al ár aksııa kezinde 50-70 adam qan tapsyrady», – dedi Ravıl Valıev.
