Kúni keshe Almatyda gazben júretin 150 jańa avtobýs satyp alyndy. Qoǵamdyq kólikterdiń jańartylýy ekologııany jaqsartý jolyndaǵy qalanyń basty jobalarynyń biri. О́ıtkeni kógildir otyn munaımen salystyrǵanda qorshaǵan ortaǵa zalalsyz. Syıymdylyǵy 90 adamdy quraıtyn sý jańa avtobýstardyń uzyndyǵy – 12, al eni – 2,8 metr. Búginde qalada 20 avtobýs parki jumys isteıdi. Jyl aıaǵyna deıin taǵy 83 avtobýs, onyń ishinde 38 elektrobýs satyp alý kózdelgen. Jýyq arada jolaýshylar tasymaly parki 233 ekologııalyq taza kólikpen tolyǵa túspek. Megapolıstegi 147 baǵyt boıynsha qatynaıtyn 1 940 avtobýstyń 321-i kógildir otynmen júredi.
Shahar ekologııasynyń ahýalyn tikteýge baǵyttalǵan taǵy bir tyń joba retinde ekologııalyq kórsetkishterdiń onlaın kartasy iske qosylǵanyn aıtýǵa bolady. Qalanyń aýa atmosferasy jaıly barlyq málimetti biriktiretin dınamıkalyq platformany tabıǵat janashyrlary da qoldap otyr. О́ıtkeni joba turǵyndarǵa qorshaǵan ortanyń jaǵdaıy men aýa sapasy týraly keń maǵlumat beredi.
– Monıtorıngtik stansalar árbir 20 mınýt saıyn onlaın rejimde aýa sapasyn anyqtaıdy. Mundaǵy kórsetkishter grafıkter jáne sandyq derekter túrinde beriledi. PDK ındıkatorlarynyń dınamıkasy da kórsetiledi. Stansalar atmosferadaǵy lastaýshy zattardyń kólemin, sondaı-aq ylǵaldylyq, temperatýra, qysym, jeldiń baǵyty men jyldamdyǵyn ólsheıdi. Kezeńniń ortasha mánderi jáne ortasha kúndik kórsetkishteri esepteledi. Jobanyń maqsaty – sarapshylar men mamandarǵa onlaın formatta málimet berý. Sonymen qatar jınaqtalǵan kórsetkishter boıynsha aýa sapasynyń jáne basqa parametrlerdiń ózgerýin boljaýǵa múmkindik beretin málimetter bazasyn qurý, – deıdi qala ákimdiginiń baspasóz qyzmeti.
Almatyda aýa sapasyna monıtorıng júrgizetin 10 stansa bar. Atalǵan stansalardyń málimetterin qala kóshelerindegi LED-ekrandardan kórýge bolady. Bıyldan bastap qorshaǵan ortaǵa túsetin tehnogendik júktemeni azaıtý maqsatynda qalaǵa kirip-shyǵatyn tranzıttik júk kólikteriniń qozǵalysy shektelýi múmkin.
ALMATY
