«Qazaqstannyń 100 jańa esimi» jobasy – Táýelsizdik jyldarynda tabysqa jetken, elimizdiń ár óńirinde turatyn túrli jastaǵy, san alýan etnos ókilderiniń tarıhy. Joba 2017 jyly Elbasy N. Nazarbaevtyń bastamasymen jaryq kórip, bıyl da jalǵasyn tapty.
QR Aqparat jáne qoǵamdyq damý mınıstri Aıda Balaevanyń aıtýynsha, bıylǵy baıqaý – el Táýelsizdiginiń 30 jyldyǵy aıasynda uıymdastyrylýda. Osy jyldar ishindegi elimizdiń tabystary – el azamattarynyń eren eńbeginiń jemisi. Jaqsydan úıren degen halqymyz jas urpaqty osyndaı adamdardan ónege alýǵa tárbıelegen.
Jobaǵa elde jáne elden tys jerlerde turatyn qazaqstandyqtar qatysa alady. Qatysýshylardyń ótinimderi kelesi 7 nomınasııa boıynsha irikteledi: medısına, bilim berý, ǵylym jáne ınnovasııa, ekologııa, mádenıet jáne sport, bıznes, qoǵam.
Qatysý úshin úmitkerler 100janaesim.ruh.kz saıtyndaǵy saýalnamany toltyrý qajet. Joba sharttaryna sáıkes qatysýshy senimdi aqparat berýge mindettenedi. Jalǵan aqparat usyný, onlaın daýys berý kezinde falsıfıkasııaǵa júginý syndy nemese ózge de quqyq buzýshylyq aktileri anyqtalsa, uıymdastyrýshylar qatysýshyny jobadan shyǵaryp jiberýge quqyly.
Barlyq ótinimder moderasııadan ótedi, keıin saıtta jarııalanady. О́tinimderdi qabyldaý merzimi aıaqtalǵannan keıin búkilhalyqtyq onlaın daýys berý bastalady. Sondaı-aq, ótinimderdiń belgili bir bóligi tanymal qoǵam jáne mádenıet qaıratkerleri, sport, bıznes ókilderinen turatyn qazylar alqasynyń qaraýyna usynylady. Oǵan qosa osy jyldan bastap ótken maýsymdardyń jeńimpazdary qazylar alqasynyń quramyna enedi.
Daýys berý kezinde eń kóp upaı jınaǵan jáne qazylar alqasynyń tańdaýyna ilingen qatysýshylar aǵymdaǵy jyldyń sáýir aıynda joba jeńimpazdary bolyp atanady.
Aldaǵy birer aıda biz Otanymyzdyń halyq rızashylyǵyna laıyqty jáne egemen elimizdiń jańa kelbeti atanatyn esimdermen tanys bolamyz.
