SOǴYS AQIQATTY TALAP ETEDI

Almatyda “1941-1945 jyldardaǵy Uly Otan soǵysyndaǵy keńes halqynyń jeńisi jáne qazirgi kezeń” atty ǵylymı-teorııalyq konferensııa ótken edi. Almaty qalalyq ardagerler keńesi, “Nur Otan” HDP-nyń uıymdastyrýymen Abaı atyndaǵy Qazaq ulttyq pedagogıkalyq ýnıversıtetinde bolǵan jıynǵa Uly Otan soǵysynyń ardagerleri, ǵalymdar qatysyp, el basyna tóngen aýyr jyldar jóninde baıandady. Uly Jeńistiń 65 jyldyǵyna arnal­ǵan ǵylymı-teorııalyq konferen­sııa­da nemis-fashıst basqyn­shylarymen shaı­qastaǵy aǵa urpaqtyń qaharmandyq óshpes erligi jáne jas urpaqtyń qasıetti Otan aldyndaǵy paryzy áńgime ózegine aınaldy. – Fashıstik basqynshylardyń Keńes Odaǵynyń halqyna ákelgen qasireti men qaıǵysy orasan. Olar odaq boıynsha 1710 qalany jáne 70 myńnan astam selolardy ór­tep, turǵyndardyń dúnıe-múlkin tonap, kúl-talqanyn kókke ushyrdy. Sonymen qatar, 32 myń óndiristik kásiporyn, 100 myń­daı kolhoz jáne eki myńǵa jýyq sovhoz osyndaı oıranǵa ushyrady. Eń bas­tysy jáne eshqashan orny tolmaıtyn óte aýyr jaraqat – ol adam ómiri bola­tyn. Elimiz surapyl soǵysta 20 mıl­­lıonnan astam uldary men qyz­darynan aıyryldy. Sóz reti kelgende atap aıtar­lyǵy, Qazaq­stan Keńes Odaǵynyń fashızmge qarsy joıqyn shaıqasyndaǵy jeńisine aıtarlyqtaı mol úles qosty. Qazaqstandyqtar qandy maıdanda qaharmandyq pen qaısarlyqtyń úlgisin kórsetti, 602939 adam jas urpaqtyń baqytty bolashaǵy úshin erlikpen qaza tapty. Keńes Odaǵynyń batyrlary, Halyq Qaharmandary, qazaq halqynyń erjúrek qyzdary – Álııa Moldaǵulova, Mánshúk Mámetova men Hıýaz Dospanova­nyń esimi máńgige el esinde qaldy. Elimizde soǵys qasiretin tartpaǵan birde-bir shańyraq qalǵan joq. Sondyqtan da mıllıondaǵan maıdangerlerdiń ómirimen, analardyń kóz jasymen kelgen Jeńisti qadirlep, qur­metteıik. Jastar aǵa urpaq­tyń ulaǵatyna adal bolsyn,– dedi Almaty qalalyq Ardagerler keńesiniń tóraǵasy Erenǵaıyp Shaıhýtdınov óz oıyn ortaǵa salyp. Shyn mánisinde de, búginde Uly Otan soǵysyn óz kózimen kórmegen, onyń aýyzben aıtyp jetkizgisiz aýyr azabyn bastan keshpegen keıbireýlerdiń Uly Jeńis týraly oıǵa syımaıtyn orynsyz pikirler aıtýy kópshiliktiń, ásirese oq pen ottyń ortasynan oralǵan maıdan­gerler janyna úlken jaraqat salýda. Búgingi baqytty ómir úshin jastar aǵa urpaqtyń aldynda máńgi qaryzdar jáne keleshekte de Otan qorǵaý­shylarǵa degen qadir-qurmet odan ári kóbeı­mese azaımaq emes. Keńes Odaǵynyń Batyry, Qazaq­stan­nyń Halyq Qaharmany, Armııa generaly Saǵadat Nurmaǵanbetovtyń aıtýynsha, “qurylǵanyna nebári jıyrma jyl ǵana bolǵan jap-jas memlekettiń saqa­daı-saı qarýlanǵan fashıstik Germa­nııany oısyrata jeńýi shyndyǵynda da orasan erlik”. “Eń bir tańǵalarlyǵy, halyqtyń sol kezdegi turmystyq jaǵdaıy nashar bolǵanyna qaramastan, olar joǵary ynty­maqtastyq pen uly dostyqtyń, myzǵymas birliktiń úlgisin tanytyp, Uly Jeńiske qol jetkizdi. Myńdaǵan uldarymyz, qyzdary­myz “týǵan Otan úshin” dep qyrshynynan qıyldy. Búgin de, erteń de jáne kele­shekte de olardyń aldynda bárimiz máńgi qaryz­darmyz. “Soǵys bizden aqıqatty talap ete­­di, sol sebepten de ony búgin keı­bi­reý­­ler­diń burmalaýynyń qajeti joq. Son­dyq­t­an da, táýelsiz Qazaqstan halqy, bizdiń bárimiz, el ıgiligi úshin jan aıamaı eńbek etýimiz qajet” deıdi Saǵadat Nurmaǵanbetov. Azamattyq ustanymy myǵym, týǵan eliniń baqytty bolashaǵy úshin otqa tús­ken maıdangerler erligi tóńireginde baıan­­daǵan “Nur Otan” HDP Almaty qala­­­­lyq fılıaly tóraǵasynyń oryn­basary Aman­geldi Karımýllın “búgingi beıbit as­pan úshin” olarǵa máńgi qaryz­dar jan­dar atynan óz alǵysyn bildirdi. Káme­lettik jasqa tolar-tolmas­tan qol­daryna qarý alyp, laýlaǵan ot pen ólim ýyn sepken maıdan dalasyna attan­ǵandar týǵan jerdi súıýdiń, patrıotızm­niń ozyq úlgisin kór­set­kendigi jóninde jıynda sóz alǵandar jan-jaqty túrde aıtyp berdi. Uly Jeńis­ke jáne qazirgi kezeńge arnal­ǵan ǵy­lymı-teorııalyq konferen­sııanyń sek­sııa­lyq otyry­synda ǵalymdar Uly Jeńis­tiń áleýmettik-saıası aspektileri jáne qazirgi kezdegi jergilikti soǵystar­dyń mańyzdy problemalaryn tilge tıek etti. Almaty qalasy ákiminiń orynbasary Serik Seıdýmanov jıynda kópshilik kópten kútken qýanyshty habardy jarııa etti. Qazaq halqynyń aty ańyzǵa aınal­ǵan batyr uly – Baýyrjan Momyshuly­na Almatydaǵy 28 Panfılovshylar parkinde eskertkish ornatylatyndyǵy habarlandy. Sonymen, er esimi el esinde máńgi qala bermek. Baqyt BALǴARINA. ALMATY.