Bul kúnde óńirde karantın talaptary alynǵanymen, áli de bolsa turǵyndardyń qaýipsizdik sharalaryn ustanýy, tártipke baǵynýy kerektigi jıi aıtylýda. Qazirgi kezde óńirdegi kóptegen aýdanda ottegi stansasynyń joqtyǵy ózekti máselege aınalǵan. Atalǵan máseleni oblystyq qoǵamdyq keńestiń tóraǵasy Ámzebek Jolshybekov te kóterdi. Máselen, búginde oblystaǵy emdeý mekemelerinde tósektik qory jetkilikti. Mekemeler men dárihanalardy dári-dármekpen qamtý, indetke qarsy ekpe egý jumystary da aıtarlyqtaı qarqyndy júrgizilýde. Birinshi kezeńde oblysqa Spýtnık V vaksınasynyń 1 myń dozasy jetkizilip, barlyq emdeý mekemelerine taratylǵan. Bul da qaýipti indettiń aldyn alý maqsatynda qabyldanǵan sheshim. Degenmen «Jaman aıtpaı, jaqsy joq», turǵyndar ótken jylǵydaı qaýipti indet qaharyna qaıta mingen jaǵdaıda ottegi stansalarynyń joqtyǵyna alańdaýly.
«Oblys boıynsha tek Taraz qalasynda ǵana, onyń ózinde bar-joǵy 4 emdeý mekemesinde ǵana ottegi stansasy bar. Byltyr indet ýshyqqan kezde naýqastardyń deni ottegi jetispeýshiliginen kóz jumǵany belgili. Sol kezde medısınalyq mekemeler kúnine 170-180 ottegi ballonyn almastyryp otyrýǵa májbúr bolǵan edi. Beti aýlaq, eger sol jaǵdaı taǵy qaıtalanatyn bolsa, shalǵaı aýdandarǵa Taraz qalasynan ottegi ballondaryn der kezinde jetkizip otyrý múmkin emes. Osyny bile tura alystaǵy aýdandar nege ottegi stansalarymen qamtylmaı otyr?», deıdi medısına ǵylymdarynyń doktory, oblystyq qoǵamdyq keńestiń múshesi Saǵyndyq Ordabekov.
Shynynda da, aýdandarda ottegi ballondarynyń jetispeýshiligi úlken másele. Byltyr talaı adamnyń taǵdyry osyǵan baılanysty bolǵany jasyryn emes. Bul oraıda, oblystyq densaýlyq saqtaý basqarmasynyń basshysy Áset Qalıev atalǵan másele boıynsha bıýdjetten arnaıy qarjy bólinip, qazirgi tańda eki aýdanǵa ottegi stansasyn ornatý jumysy qolǵa alynyp otyrǵanyn aıtty.
«Bıýdjet esebinen alynǵan medısınalyq apparattan bólek, demeýshilik kómek esebinen de 122 ottegi konsentratory, 14 ókpeni jasandy jeldetý apparaty alynyp, olar óńirdegi emdeý uıymdaryna berildi. Qazir Merki, Shý aýdandary kompıýterlik tomografııa apparatymen qamtylsa, jaqynda osyndaı jabdyq Qordaı aýdanyna da beriletin bolady», deıdi basqarma basshysy.
Sondaı-aq qaýipti indettiń beti qaıtpaı turǵanda, kópshiliktiń toı, jıyn sııaqty ádetterden tyıylmaı otyrǵany da ózekti másele. Máselen, jýyrda ǵana Jýaly aýdanynda kókpar uıymdastyrylyp, oǵan 200-den astam adam qatysqan. Sol sııaqty, kún saıyn júzdegen adamǵa kópshilikti jınap, toı, as berý sııaqty sharalardy uıymdastyrǵany úshin aıyppul salynýda. Taraz qalasyndaǵy qoǵamdyq kólikterde de medısınalyq maskasyz ári-beri júrgender kóp. Bul rette oblystyq sanıtarlyq-epıdemıologııalyq baqylaý departamenti basshysynyń orynbasary Neılıa Mýlıkova jekelegen adamdar men zańdy tulǵalarǵa sanıtarlyq talaptardy saqtamaǵany úshin 20 mln teńgeden asa aıyppul salynǵanyn, onyń bıýdjet esebine óndirilgenin jetkizdi.
Qazirgi kezde aýdandarda ottegi stansalarynyń jetispeýshiligi, kópshiliktiń qaýipsizdik sharalaryn saqtamaýy kúrdeli másele. Tipti talap pen tártipke baǵynbaý indettiń qaıta órshı túsýine alyp kelýi múmkin. Eger árkim qaýipsizdikti ózinen bastasa, ol ózine de, ózgege de paıdaly bolmaq.
Jambyl oblysy
