Jýyrda elimizde birjolǵy zeınetaqy tólemin em-domǵa paıdalaný Erejesi qoǵam talqylaýyna usynylǵan bolatyn. Tıisti qujat Normatıvti-quqyqtyq aktiler ashyq portalyna ornalastyryldy. Birjolǵy zeınetaqy tólemderin emdelýge paıdalaný Qazaqstan Respýblıkasynyń azamattaryna kepildendirilgen tegin medısınalyq kómek jáne (nemese) mindetti áleýmettik medısınalyq saqtandyrý aıasynda qarastyrylmaǵan medısınalyq qyzmetterdi qosymsha alýǵa múmkindik beredi.
Otandastarymyz ózderiniń zeınetaqy jınaqtarynyń bir bóligine elimizdegi klınıkalarda qandaı em ala alady? Jýyrda Ortalyq kommýnıkasııalar alańynda ótken brıfıngte Densaýlyq saqtaý mınıstrliginiń Medısınalyq kómekti uıymdastyrý departamenti dırektorynyń orynbasary Gúlnar Sársenbaeva osy saýalǵa jaýap berdi.
«Azamattar Qazaqstandaǵy kez kelgen klınıkada jáne stomatologııalyq qyzmetterdi qospaǵanda shet elderde barlyq qyzmetti ala alady. Biraq bul rette kelisimshart jasalatyn medısınalyq uıymda atalǵan medısınalyq qyzmet túrin kórsetýge arnalǵan lısenzııa bolýy tıis. Ony alý úshin azamat BJZQ-nyń ınternet-resýrsy nemese «elektrondy úkimet» veb-portaly arqyly birjolǵy zeınetaqy tóleminiń qoljetimdi somasyn anyqtaýy qajet. Eger qordaǵy soma jetkilikti bolsa, onda azamat tirkelgen jeri boıynsha medısınalyq uıymǵa júginip, dárigerlik komıssııanyń birjolǵy zeınetaqy tólemderi esebinen emdelýge jiberý týraly qorytyndysyn alýy qajet», dedi G.Sársenbaeva.
Mamannyń túsindirýinshe, dárigerlik komıssııa ótinish bergen kúnnen bastap 5 jumys kúninen keshiktirmeı zeınetaqy tólemderi esebinen emdelýge jiberý týraly ne medısınalyq kórsetkish bolmaǵan jaǵdaıda bas tartý týraly sheshim qabyldaıdy. Qorytyndy dárigerlik komıssııanyń otyrysy ótkizilgen kúnnen bastap 2 jumys kúni ishinde beriledi. Jınaqtalǵan zeınetaqy qarajaty esebinen azamattar orfandyq aýrýlardy emdeý, Qazaqstan Respýblıkasynyń aýmaǵynda ornalasqan medısınalyq uıymdarda kórsetiletin stomatologııalyq qyzmetter (tisti protezdeý, ımplantasııa), operasııadan keıingi tyrtyqtar men týa bitken aqaýlardy túzetý maqsatynda rekonstrýktıvti jáne qalpyna keltirý operasııalary (plastıkalyq), sondaı-aq mastektomııa, radıonýklıdtik jáne radıoıodterapııa, radıohırýrgııalyq emdeý (gamma-pyshaq, kıber pyshaq), protondy terapııa, oftalmologııalyq qyzmetter sııaqty qymbat turatyn qyzmetterdi ala alady. Atalǵan tizbe halyqtyń qajettiligin eskere otyryp ózgerýi de yqtımal.
Medısınalyq komıssııanyń oń qorytyndysy bolǵan jaǵdaıda ótinish berýshi medısınalyq uıymdy tańdap, shart jasasýy qajet. Sodan keıin ESQ kómegimen ýákiletti operatordyń ınternet-resýrsynda óziniń jeke kabınetin ashý, onda somasy men paıdalaný maqsatyn kórsete otyryp, birjolǵy zeınetaqy tólemine elektrondy ótinishti toltyrý, dárigerlik komıssııa qorytyndysynyń skanerlengen kóshirmelerin, medısınalyq uıymmen emdeý týraly shartty bekitý jáne óziniń ESQ-men kýálandyrý qajet. О́tinish berýshiniń ESQ-sy qoıylǵan, ýákiletti operatorda tirkelgen Tólemge arnalǵan ótinish týraly málimetter BJZQ-ǵa elektrondy habarlama sheńberinde kelip túsedi. BJZQ ýákiletti operatordan elektrondy habarlama alǵan kúnnen bastap 5 jumys kúni ishinde birjolǵy zeınetaqy tóleminiń somasyn ótinish berýshiniń ýákiletti operatorda ashylǵan arnaıy shotyna aýdarady. Ýákiletti operator alýshy usynǵan birjolǵy zeınetaqy tólemderiniń nysanaly maqsaty boıynsha qujattardy tekseredi jáne olar sáıkes kelgen jaǵdaıda olardy alǵan kúnnen bastap 5 jumys kúni ishinde ótinish berýshi tańdaǵan medısınalyq uıymnyń nysanaly maqsaty boıynsha qarajatty aýdarady.
«Sondaı-aq jubaıynyń (zaıybynyń), jaqyn týystarynyń birjolǵy zeınetaqy tólemderin emdeýge paıdalanýǵa bolatynyn atap ótkim keledi. Mundaı jaǵdaıda taraptar jeke kabınette týystyq qatynastardy rastaıtyn qujattardy qosa kórsetip, olardyń ESQ-men kýálandyrylatyn birjolǵy zeınetaqy tólemderin berý týraly kelisim jasasady», dedi G.Sársenbaeva.
Bir aıta keterligi, emdelýge beriletin birjolǵy zeınetaqy tólemderine EKU jasatýǵa bolmaıdy.
«Bastapqyda tizimde bolǵan keıbir aýrý túrleri sońǵy sátte alynyp tastaldy. Qazirgi ýaqytta biz búkil tetigin pysyqtap jatyrmyz», dedi «Otbasy banki» AQ basqarma tóraǵasy Lázzat Ibragımova. Bul rette Gúlnar Sársenbaeva tizimnen EKU jasatý prosedýrasynyń nelikten alynyp tastalǵanyn túsindirdi. Onyń aıtýynsha, bıyl elimizde «Ańsaǵan sábı» atty arnaýly baǵdarlama iske qosyldy. Osyǵan oraı jyl saıyn Mindetti áleýmettik medısınalyq saqtandyrý aıasynda 1 myń kvota bólý josparlanǵan. «Bıyl kvota sany 7 esege artyp, 7 myńǵa jetti. Sondyqtan Mindetti áleýmettik medısınalyq saqtandyrý aıasynda bul qyzmetter ólshemsharttarǵa sáıkes muqtaj otbasylarǵa kórsetiledi. Aldaǵy ýaqytta qaraımyz. Eger shynymen de mundaı qajettilik bolsa, onda bul máseleni atalǵan tizimge qosýdy qarastyramyz», dedi ol.
Erteń, ıaǵnı 25 aqpan kúni emdelýge beriletin birjolǵy zeınetaqy tólemderin alýǵa ótinish berýge arnalǵan portal iske qosylady. Jýyrda Emdelýge beriletin birjolǵy zeınetaqy tólemderin paıdalaný erejesi resmı túrde jarııalanyp, kúshine endi.
Aıta ketelik, bıylǵy 1 aqpandaǵy jaǵdaı boıynsha, Biryńǵaı jınaqtaýshy zeınetaqy qory salymshylarynyń shotynda 13,1 trln teńge zeınetaqy jınaǵy qalyptasty. Bir jyl ishinde onyń somasy 2,2 trln teńgege artty nemese 21%-ǵa ósti. Zeınetaqy jınaǵynyń negizgi somasy mindetti zeınetaqy jarnasy esebinen quraldy, onyń mólsheri – 12,8 trln teńge. Mindetti kásiptik zeınetaqy jarnasy boıynsha – 324,4 mlrd teńge, al erikti zeınetaqy jarnasy 2,2 mlrd teńgege jetti.
