Nátıjesinde 25 myń gektar egistik jerlerdiń ıgerýsiz qalǵany anyqtalǵan. Máselen, atalǵan basqarma basshysy 2019 jyly oblys aýdandarynda 35,5 myń gektar egistik jerler ıgerýsiz qalǵanyn, osyǵan baılanysty qatań sharalar qoldanýǵa týra kelgenin, qolǵa alynǵan shuǵyl sharalardan keıin ıgerilmegen egistiktiń 2503 gektary memleket menshigine qaıtarylǵanyn aıtty.
«Jalpy, Jambyl oblysynyń jer qory 14 myń 427,7 gektardy quraıdy. Bul respýblıka aýmaǵynyń 5,3 paıyzy degen sóz. Onyń ishinde eń aýqymdy alqap – aýyl sharýashylyq maqsatyndaǵy jerler. Bul baǵytta eldi mekenderdiń jerleri 464,8 myń, ónerkásip, kólik, baılanys, qorǵanys maqsatyndaǵy jerler 174,7 myń, erekshe qorǵalatyn tabıǵı aýmaqtardyń jerleri 11,6 myń, orman qorynyń jerleri 4429,0 myń, sý qorynyń jerleri 356,1 myń jáne bosalqy jerler 1796,4 myń gektardy quraıdy. Aımaqta ıgerýsiz qalǵan alqaptardy aýylsharýashylyǵy aınalymyna qaıta qosý qolǵa alynǵan. Máselen, 2019 jyly 199,1 myń gektar jer ekonomıkalyq aınalymǵa qaıta qoldanýǵa berildi. Osy maqsatta ótken jyly 18 konkýrs ótse, bıyl 100 myń gektar aınalymǵa qosylatyn bolady. Osy jyly oblysta 19 konkýrs ótkizilmek. Nátıjesinde 117,2 myń gektar aýyl sharýashylyq jerler qaıta aınalymǵa qosylady», dedi basqarma basshysy Bahtııar Kópbosynov.
Aımaqta byltyr bos qalǵan jerlerge baılanysty 25 aýksıon ótken. Oǵan 74 gektar jer shyǵarylyp, bıýdjetke 196,4 mıllıon kóleminde qarajat túsken. Jalpy, óńirde ınvestısııalyq-ınnovasııalyq jobalarǵa jer berilip turady. Sońǵy eki jylda jalpy kólemi 3774 gektar jer paıdalanýǵa berilgen.
