10-15 jyl buryn naýqastar kúrdeli operasııaǵa jatý úshin Nur-Sultanǵa, sál keıin oblys ortalyǵyna sabylatyn. Onyń ózinde aldymen naýqasty portalǵa qoıady. Árıne, jedel operasııa qajet bolmasa. Sodan soń ýaqyty kelgende býma-býma qaǵaz qushaqtap júrip, kabınetten kabınetke kiredi. Tapsyratyn taldaýlary da az emes. Uzyn-sonar kezek te bar edi.
Qazir medısına damyp keledi. Basshylar «barmaq basty, kóz qystyǵa» jol berip qoımasa, aýdandarǵa da kóńil bólinip jatyr. Kótermeaqysy men baspanasyn berse, alys eldi-mekenderge barýdan aq halattylar da tartynbaıdy. Sonyń bir aıǵaǵy, bıyl 15 aqpanda Altaı aýdanynyń ortalyq aýrýhanasynda angıograftyń jumysy iske qosyldy. Qarapaıym tilmen aıtsaq, osydan bylaı naýqastarǵa operasııalar skalpelsiz jasalatyn bolady. Ony tájirıbeli maman, dáriger-ıntervent Damır Maratuly júrgizedi.
Intervensııalyq nemese endovaskýlıarlyq hırýrgııa – rentgendik endovaskýlıarlyq ádisin qoldana otyryp, adam denesindegi aqaýdy skalpelsiz qalypqa keltirý. Iаǵnı medısınalyq quraldy zaqymdalǵan múshege tamyrlar arqyly jetkizedi. Aýdandyq aýrýhana operasııaǵa qajetti joǵary tehnologııalyq angıografııalyq jabdyqpen qamtamasyz etildi. Endi naýqastarǵa oblys ortalyǵyna barýdyń qajeti joq, kóptegen operasııalar aýdanda-aq jasalady.
– Kez kelgen ınfarkt eski tásilmen emdelmese, júrek bulshyqetiniń nekrozyna, ólimge ákelip soǵýy múmkin. Qazir bizde stenokardııamen aýyratyn 61 jastaǵy naýqas em alyp jatyr. Bul ádis onyń ıshemııasy bar-joǵyn, býyndarynyń jumys isteýin, tamyrlardyń tarylǵanyn anyqtaýǵa múmkindik beredi. Qajet bolsa, stent ornatylady. Mamandardy daıarlaý úsh jylǵa jýyq ýaqyt alady. Sondyqtan aýdanǵa oblys ortalyǵynan arnaıy dáriger-ınterventti shaqyrdyq, – deıdi aýdandyq aýrýhananyń bas dárigeri Oljas Nurkenov.
Altaı aýdany naýryzdan bastap búkil jyldyq kólemde jasalatyn operasııany tolyǵymen qamtýdy josparlap otyr. Ázirshe, operasııa Altaı turǵyndaryna ǵana júrgiziledi. Al aldaǵy ýaqytta angıograf tolyq qýatta jumys isteı bastaıdy.
Shyǵys Qazaqstan oblysy,
Altaı aýdany
