Konferensııa jumysyna Ekologııa mınıstrligi Orman sharýashylyǵy jáne janýarlar dúnıesi komıtetiniń, Ile-Alataý MUTP, BUUDB, túrli ekologııalyq qoǵamdyq uıymdardyń, sondaı-aq joǵary oqý oryndarynyń ókilderi qatysty.
Konferensııa barysynda Ile-Alataý MUTP-niń bıoalýantúrliliginiń qazirgi jaǵdaıyna qatysty máseleler qozǵaldy.
Is-sharaǵa qatysýshylardyń aldynda Ile-Alataý MUTP bas dırektorynyń orynbasary Darhan Isabekov sóz bastap, parktiń 1996 jyly 22 aqpanda qurylǵanyn eske saldy. D. Isabekov baıandamasynda parktiń jalpy aýdany 199 185 ga quraıtyny, onyń ishinde qoryq 62 137 ga (31,2%), týrıstik-rekreasııalyq qyzmet aımaǵy - 15 408 ga-dy (7,8%) alyp jatqany baıandaldy.
Ulttyq parkti qurýdyń negizgi maqsaty – biregeı tabıǵı keshender men ekojúıelerdi saqtaý bolyp tabylady.
Aıta ketý kerek, saıabaqtyń florasy men faýnasy baı jáne alýan túrli. Munda omyrtqaly janýarlardyń 270-ke jýyq túri mekendeıdi, olardyń 16-sy Qazaqstannyń Qyzyl kitabyna engizilgen. Saıabaqta ósetin ósimdikterdiń 2000-nan astam túriniń 37-si «Qyzyl kitap»-qa engizilgen. Sonymen qatar, MUTP aýmaǵynda 5000-nan astam jándikter men órmekshiler mekendeıdi.
Parkte janýarlar dúnıesin qorǵaý jáne ósimin molaıtý úsh negizgi baǵyt boıynsha júzege asyrylady: kúzet, esepke alý jáne bıotehnıkalyq sharalar. Qazirgi ýaqytta qoldanystaǵy zańnamaǵa sáıkes saıabaqta ań aýlaý qyzmeti júrgizilmeıdi.
Bıoalýantúrlilikti zertteý jáne ulttyq parktiń ekojúıelerine monıtorıng júrgizý úshin túrli baǵyttar boıynsha ǵylymı-zertteý jumystary júrgizilýde.
Baıandamashy sondaı-aq saıabaqta ornalasqan aporttyń alma baǵyn jańǵyrtý máselelerine jınalǵandardyń nazaryn aýdardy. Jobany barlyq múddeli taraptardy, ǵalymdardy, jergilikti qoǵamdastyqtar men mamandardy tarta otyryp, parktiń bıoalýantúrliligin turaqty basqarý negizinde iske asyrýǵa bolady. Qazirgi ýaqytta saıabaqtaǵy eski alma baqtarynyń aýdany 200 ga-dy quraıdy.
Parktegi ekotýrızmdi damytýdyń taǵy bir mańyzdy jobasy jylý kózderi bolýy múmkin. Tushy sý kózderin ashý jáne jaqsartý MUTP-nyń perspektıvalyq mindetteri retinde belgilengen.
Konferensııa aıasynda ekotýrızm men eldegi saıabaqtardy damytý perspektıvalary týraly máseleler talqylanyp, kelgen baıandamashylar óz baıandamalaryn osy taqyryp aıasynda tarqatty.
