Tóraǵa orynbasary óz sózinde Memleket basshysy serpindi ınfraqurylymdyq jobalar, qyzmet kórsetý deńgeıi men tranzıt baǵyttardaǵy jyldamdyqty arttyrý esebinen Qazaqstannyń básekege qabilettiligin arttyrý maqsatyn alǵa qoıǵanyn eske saldy. Atap aıtqanda, 24 myń shaqyrym joldy, ıaǵnı barlyq respýblıkalyq joldar men ondaǵy qyzmet kórsetýlerdi 2025 jylǵa deıin qaıta qurý jáne qamtamasyz etý mindeti qoıyldy.
Senatorlar osyǵan deıin Úkimet atyna joldaǵan depýtattyq saýalynda elimizdiń tranzıttik áleýetin damytý máselesin aıtqan bolatyn.
«Kólik qaýipsizdigin qamtamasyz etý deńgeıiniń jetkiliksizdigi, osy saladaǵy memlekettik saıasatqa halyqtyń rızashylyq deńgeıiniń tómendigi saladaǵy mańyzdy problemalardyń biri bolyp tabylady. Kóliktegi qaýipsizdik deńgeıin arttyrýdy memlekettik saıasattaǵy basym mindetterdiń biri retinde qarastyrý qajet», dedi Asqar Shákirov.
Otyrys barysynda Bas prokýratýranyń, Ulttyq qaýipsizdik komıtetiniń, ındýstrııa jáne ınfraqurylymdyq damý, syrtqy ister jáne qorǵanys mınıstrlikteriniń, basqa da mekemeler men qoǵamdyq uıymdardyń ókilderi qatysty.
Senatorlar kólik qaýipsizdigi salasyndaǵy quqyqtyq, uıymdastyrý jáne tehnıkalyq problemalar, sondaı-aq belgilengen máselelerdi sheshý jónindegi qabyldanyp jatqan sharalar týraly habardar etildi. Atap aıtqanda, salalyq zańnamany iske asyrý barysy, áýe kemelerin paıdalanýshylardyń sertıfıkattaý talaptaryna túzetýler boıynsha bastama jasaý, kólik salasyna ınvestısııa tartý jónindegi halyqaralyq yntymaqtastyqty keńeıtý týraly aıtyldy.
Halyqaralyq qatynastar, qorǵanys jáne qaýipsizdik komıtetiniń tóraǵasy Muhtar Qul-Muhammed otyrysty qorytyndylaı kelip, elimizdiń ekonomıkalyq qaýipsizdiginiń quramdas bóligi bolyp tabylatyn kólik qaýipsizdigi deńgeıin arttyrý jóninde barlyq memlekettik organdardyń kelisilgen qyzmeti qajettigin atap ótti. Ol sondaı-aq otyrys barysynda senatorlar aıtqan usynystardy memlekettik organdardyń eskeretinine senim bildirdi.
Depýtattar óz kezeginde zań shyǵarý arqyly kólik qaýipsizdigi problemalaryn sheshýge kómektesýge daıyn ekendikterin atap ótti.
