M. O. Áýezov atyndaǵy Ádebıet jáne óner ınstıtýtynyń dırektory Kenjehan Matyjanov feısbýk paraqshasynda Qazaqstan Respýblıkasy Bilim jáne ǵylym mınıstrligi Ǵylym komıtetiniń qoldaýymen M. O. Áýezov atyndaǵy Ádebıet jáne óner ınstıtýtynyń qoljazba jáne aýdıo-vıdeo qory bıyldan bastap sıfrlyq formatqa kóshirilip jatqandyǵy jaıynda jańalyqpen bólisti.
«Bul rette ınstıtýt qorynda saqtalǵan 5000-ǵa jýyq qoljazbalardy qaıta qalpyna keltirý, olardyń elektrondy kóshirmesin jasaý, myńdaǵan metrlik mıkrofılmderdi, aýdıo jáne vıdeotaspalardy, fototaspalardy, derekti fılmderdi, kúıtabaqtardy qaıta jazyp, zamanǵa saı elektrondy saqtaǵyshtarǵa engizý – búgingi kúnniń eń ózekti máselesi bolyp kelgen, sonyń túıini bıyldan bastap sheshile bastady.
Qoljazbalarǵa túsken mátinder men aýdıo taspalardyń sıfrlyq qatalogyn jasap, jalpy oqyrmandarǵa, zertteýshilerge qoljetimdi etýge arnalǵan elektrondy baǵdarlamalar jasaldy.
Qordyń qalypty jumys isteýine qajetti sanıtarlyq-dezınfeksııalyq erejelerdiń saqtalyp otyrýy úshin de tıisti materıaldyq-tehnıkalyq jabdyqtar satyp alyndy. Sonyń nátıjesinde bıyldyń ózinde Instıtýt qoljazba qorynyń 1-150 býmalaryndaǵy myńdaǵan qoljazbalar elektrondy jadqa kóshirilip, ondaǵy mátinder janrlar boıynsha katalogtarǵa jiktelip engizilýde.
Ertedegi magnıtafon taspalaryna jazylǵan kóne saryndar, dástúrli ánder men kúılerdi zamanaýı formatqa kóshirý isin jolǵa qoıý úshin ınstıtýt qabyrǵasynda aýdıo jazba stýdıosy jabdyqtalyp jumys isteı bastady. Endi ótken ǵasyrdyń basynan beri folklorlyq ekspedısııalar kezinde jınaqtalǵan magnıtofon taspalaryn sıfrlyq formatqa sapaly kóshirýdiń múmkindigi týyp otyr.
El murasyn sıfrlandyrý men katalogtar jasaý jumystary budan bylaı júıeli jolǵa qoıylyp, kúntizbelik jospar boıynsha júzege asatyn bolady».
