Ol Qyzyljardan «Volvo» aýyr júk kóligimen Túrkııaǵa 20 tonna zyǵyr áketip bara jatyp, aýyr azapqa túsedi. Soltústiktiń saqyldaǵan sary aıazynda avtokóliktiń aýa súzgisi isten shyǵady. Keshikpeı kabınanyń ishi muzdaı bastaıdy. Mundaı sýyqty kórmegen, oǵan qarsy áreket etýge mashyqtanbaǵan jyly jerdiń jigiti ómirden túńile bastaıdy. Tipti kómek surap toqtatqan kólikterge de jaǵdaıyn qazaq nemese orys tilinde túsindire almaıdy. Osylaı, ábden qınalǵan shaǵynda oǵan kómekke Soltústik Qazaqstan PD patrýldik polısııa batalonynyń qyzmetkerleri Qanat Teńizbaev pen Samat Danııarov keledi. Olar Mamlıýtka-Qostanaı tas jolynda patrýldik etip júrgen eken. Joldyń 102 shaqyrymynda turyp qalǵan «Volvony» olar alystan baıqap, jaǵdaıyn bilmekke kelgen.
Tisi tisine tımeı dirdektegen túrik azamaty olarǵa da jaǵdaıyn tolyq túsindire almaıdy. Eki jigit ony ózderiniń mashınasynyń jyly salonyna engizip, termostan ystyq kofe quıyp, boıyn jylytyp, telefondaǵy onlaın-aýdarmashynyń kómegimen turyp qalǵan sebebin bilgen. Isten shyqqan aýa súzgisin polıseıler fotoǵa túsirip, vatsappen Petropavldaǵy tanystaryna joldaıdy. Olar taksı júrgizýshisinen jańa súzgini berip jiberedi.
Al bul ýaqytta Túrkııa azamatyn polıseılerdiń ótinishi boıynsha oqıǵa ornyna kelgen TJ qyzmetkerleri qonaq úıge aparyp, jyly jerge túnetedi. Al tártip saqshylary túni boıy onyń júk kóligin qadaǵalap júredi.
Qanat Teńizbaev pen Samat Danııarov kelesi kúni tańerteń sheteldik qonaqqa jańa súzgini ornatýǵa da kómektesedi. Sóıtip ony saý-sálemet jolǵa salyp jiberedi. Rahmattyń túrikshe «teshekýrin» ǵana bilitin jigit, qazaqsha rahmatty da aýzynan tastamaı aıtyp, jolǵa shyǵady. Al PD aǵylshynsha jazǵan alǵysynda ol bylaı depti: «Men qanshama jolda júrip mynadaı polısııa qyzmetkerlerin eshqashan kezdestirmedim. Tez kómekke keledi dep kútpegen de edim. Sheksiz alǵys bildiremin!» - depti ol aýdarma baǵdarlamasy arqyly tárjimelengen óziniń sózinde.
«Biz qala syrtyndaǵy joldarǵa qyzmet kórsetý kezinde batalon qyzmetkerleriniń qıyn jaǵdaıǵa tap bolǵan barlyq adamǵa kómek kórsetýin tapsyramyz. Adamdar tarapynan bildirilgen alǵys — qyzmetkerlerdiń quqyqtyq tártip pen adamdardyń qaýipsizdigin qamtamasyz etýdegi mindetterin oıdaǵydaı oryndaǵanyna berilgen baǵa», — deıdi SQO PD PPB komandıri polısııa podpolkovnıgi Erlan Mádıev.
Sóıtip, Soltústik Qazaqstan PD patrýlderi bir adamdy ajaldan arashalap, týǵan jerine aman attandyryp jiberdi. Shyn qınalǵan adamdardyń aıtqan alǵysynan artyq qandaı syı bolýshy edi...
Soltústik Qazaqstan oblysy
