Ýaqyt óte tarıhı otanymyzǵa oralyp, Túrkııanyń Antalııa qalasynda ómir súrip jatyrmyz. Jastardyń jańa mekenge beıimdelip, úırenip ketýi ońaı bolǵanymen, bizdiń urpaq úshin bul qıynǵa túsedi. Bizdiń kóńilimiz, júregimiz – kindik qanymyz tamǵan, ósip-óngen, meıirim men qonaqjaı halyqtyń ystyq yqylasyn kórgen, dostarymyz qalǵan Qazaqstanda. Qazaq halqynyń darqan kóńili men jyly lebizin eshqashan umytpaıtynymyz haq. Osy aıtýly kúnde qýǵyn-súrginge ushyraǵan túrik baýyrlaryn syrtqa teppeı, qushaq jaıa qarsy alyp, baspanasy men asyn bólip bergen barsha Qazaq eline alǵysymdy bildiremin. Bul rııasyz kómektiń arqasynda kóptegen otandasymyz aman qalyp, balaly-shaǵaly bolyp, tamyryn tereńge jaıdy. Álemniń qaı buryshynda júrsek te, qazaq halqynyń jaqsylyǵyn umytpaı, árdaıym rızashylyǵymyzdy bildiremiz.
Nýrıdın MAILOV,
Kendala aýylsharýashylyq kompanııasy dırektorlar keńesiniń tóraǵasy
