Gúl qoıý rásimine óńirdiń zııaly qaýym ókilderi, qala turǵyndary men qonaqtary, oblystyq Qazaqstan halqy assambleıasynyń músheleri, etnomádenı birlestikterdiń basshylary men belsendileri, Assambleıa janyndaǵy Analar keńesiniń ókilderi men jergilikti jastar qatysty. Atalǵan sharaǵa Jambyl oblysynyń ákimi Berdibek Saparbaev ta arnaıy qatysyp, kópshilikti quttyqtady.
«Elbasy Nursultan Ábishuly Nazarbaevtyń Jarlyǵymen bul aıtýly kún elimizde 2016 jyldan beri atalyp ótýde. Bul kún, eń aldymen – tynyshtyq pen úndestik, beıbitshilik pen kelisimniń saltanat qurǵan kúni. Rasynda, ótken tarıhta taǵdyr taýqymetimen Uly dala tósine ár jyldarda bútindeı bir halyqtar, 800 myńǵa jýyq nemis, 102 myń polıak, 550 myń Soltústik Kavkaz halyqtarynyń ókilderi, 18 myńnan astam Qıyr Shyǵystaǵy koreı otbasylary qonys aýdardy. Qazaq halqy qıyn-qystaý zamanda olardyń basyna túsken aýyrtpalyqty qaıyspaı birge kótere bildi, baýyrmaldyqtyń úlgisin kórsetti. Osylaısha Táýelsiz elimizde 130-dan asa ult ókilderi bir shańyryq astyna toptasyp, birtutas Qazaqstan biregeı artyqshylyqtarǵa ıe boldy. Azamattar búgin bir-birine ókpe renishi bolsa keshirýi qajet. Bir-birine degen izgi tilekteri men lebizderin, aqjarma alǵystaryn bildirýi kerek. Árqaısymyzdyń júregimizde týǵan elimiz Qazaqstanǵa degen maqtanysh pen rızashylyq sezimi uıalaı bersin! Ár otbasyǵa baq-bereke, elimizge beıbit ómir jáne tabys tileımin! – dedi ákim. Sonymen qatar, merekelik sharada «Taraz qalalyq ózbek etnomádenı birlestiginiń» tóraǵasy Abdýrahman Zaınýtdınov pen Taraz qalasyndaǵy №34 orta mekteptiń dırektory, «Dúngen etnomádenı birlestiginiń» múshesi Dınara Nýralıeva sóz alyp, egemen elimizdegi beıbitshilik pen tatýlyq úshin alǵys bildirdi.
Alǵys aıtý kúnine arnalǵan sharada etnomádenı birlestikter óz tarapynan 10 shatyr tigip, qolóner jáne «Dostyq dastarhany» ulttyq taǵamdar kórmesin uıymdastyrdy. Kópshilik bir-birin merekesimen quttyqtap, dastarhannan dám tatty. Al, sharada «Qazaq» etnomádenı birlestiginiń músheleri «Qazaq osy» ánin shyrqasa, «О́zbek» etnomádenı birlestiginiń músheleri kópshilikke ulttyq ánderin tartý etti. Sondaı-aq, bul kúni Taraz qalasynyń birqatar kóshelerinde tal egý aksııasy bastaý alyp, atalǵan bastama óńir aýdandarynda da jalǵasty.
Jambyl oblysy
